Te Karere
ORONGAANGA RE A TE APII TUARUA
A teia Varaire ra 13 o Noema kua raveia te Oronga anga Re a te Apii Tereora no te au Pupu Mamaata. Ka raveia teia akakoroanga ki roto i te Telecom Sports Arena akamata i te ora 9.30am.
Ei akamata atu i te Porokaramu ka tuatua mai te Tiaki Puapii maata a Vae Unuka, i muri ake kua oronga ia te au re a te au tamariki i roto i te Pupu Mataiti 11, e oti ka tuatua akaou mai tetai vaa tuatua, ko te orongaanga re na te tamariki o te Pupu Mataiti 12, ka tuatua mai te Tekeretere o te Maraurau o te Apii a Sharon Paio i muri ake te oronga anga re a te au tamariki Pupu Mataiti 13. Kia oti kua tuatua mai te Tama Akatere o te Kumiti Apii i reira oronga ia ei te au re takake a te apii. Kia oti teia akakoronga kua akaoti i reira te apii a te au tamariki mamaata inara a te Tapati ra 15 kua akamata ta ratou Tarere NCEA no tetai rua epetoma e ka akaoti a te ra 01 o Titema.
Ko te pupu rikiriki ka raveia ta ratou orongaanga re a te ra 16 o Titema.
Ko te Apii Tuarua o Nukutere ka rave rai ratou i ta ratou Orongaanga Re a te Varaire ra 13 ki roto i te St Joseph Hall i te ora 12pm i muri ake i ta ratou Pureanga i roto i te are Pure i te ora 11am i te popongi.
TARERE APII NUMERO
A teia Ruitoru ra 11 o Noema kua raveia te Tarere Apii Numero e raveia ana i te au mataiti ravarai ki ko i te Are Karioi Nui akamata i te ora 5pm, na te au Tamariki o te Pupu Mataiti 6 ki te Mataiti 10. E 14 au Apii te ka piri mai ki teia tarereanga o teia mataiti, e ko Aitutaki ua te apii no vao mai ia Rarotonga te ka tae mai. E a tamariki i roto i te pupu tatakitai, e ka oronga ia e rua ngauru au uianga i te pupu kia pau mai. Te akateateamamao nei te au apii tatakitai ia ratou no teia tarereanga, a teia popongi Ruitoru ka tarere te Apii Te Uki Ou na ratou rai, i mua ake i te tarere i taua aiai ra.
KUMITIONA O NUTI RENI
Kua rauka mai tetai akapapuanga mei te Opati mai o te Kumitiona o Nuti Reni i konei e kua akarere ia atu te Kumiona o Nuti Reni, Tona Ngateitei Tia Barrett ki Nuti Reni no te maki.
IRIIRI KAPUA NA TE KATOATOA NO RUNGA I TE AKAVAANGA ENUA
Ka raveia tetai Iriiri Kapua a teia Monite ki mua na te katoatoa no runga i te tuatua o te tarau enua, mono ki runga i te enua, enua turanga are, e te au takaianga no runga i te tarau enua. Ka tai nei teia tu Iriiri Kapua ka raveia, kare ra i papu te ngai e raveia ei te reira, no reira akarongo ki te Ratio no te au nuti.
NGARUERUE ENUA I VITI
Kua tupu atu tetai ngaruerueanga enua ki te enua ko Viti i te enua ko Viti mei te ora 10.45pm i te po Tapati, i te mea oki e oonu rava ki raro i te take o te moana tupu ei teia, kare to Viti i kite ake ana, tinainai meitaki ta ratou moe.
Kua akakite rai te Opita Akarakara Reva a Maara Vaiimene e kua tae mai rai te tuatua mei te Opita Maata o te tuanga o te Tsunami i te Patipika nei e auraka e manamanata i teia ngaruerue enua no te mea e oonu roa ki raro i te moana mei tetai 565 kiro metera, kare e tsumani e tupu mai.
PUNANGA NUI MAKETE
Kua akatuera akaou te Punanganui a teia po Paraparau, no te maata o te au manuirii runga nei i te enua i teia au ra, ei tauturu katoa i te au tangata okooko no te akapuapinga atu i teia tuatau kimi moni na ratou. Ko teia porokaramu tei akatuera atu i teia epetoma i topa, na te Punanga Nui rai i akanoonoo e ka tuera i te aiai Paraparau o te au epetoma tatakitai, ia tatou e tomo atu nei ki roto i te au tuatau tamataora.
MAINE PATIPIKA
A teia marama kua raveia te tarere maine Patipika ki te oire maata o Viti ko Suva.
Ka akaruke atu a Maine Kuki Airani Engara Gosselin no te enua Viti a teia epetoma ki mua no teia tarereanga. Tei runga i te kupenga roro uira te ikianga no Maine Kupenga Roro Uira, aere atu ikiia ta tatou taine ki runga i te kupenga – www.misssouthpacificfiji.com
TUEPORO LEAGUE
I roto i teia ra Ruirua ra 10 o Noema kua oronga ia atu te Metara Ario no te Pacific Cup tei riro mai ki te Pupu Tueporo League o te Kuki Airani i te marama i topa ki te Kuki Airani ki te Para Minita Jimi Marurai. Kua riro e na te tangata tereni ko David Farleigh e pera te Rangatira Pupu ko Tere Glassie i oronga i teia akairo nei, kua aru katoa mai e rua nga arataki o te pupu, ei akaari i ta ratou akameitakianga no te tauturu e te turuturu tei rauka i te pupu o te Kuki Airani i teia tarekareka tei raveia atu ki Papua Niu Kini. Kua ruti atu oki te Kuki Airani i roto i te tueanga openga no teia kapu ki te pupu o Papua, ina i te mea ko Papua tei autu atu i na ka piri atu ratou i reira no te tueanga a nga enua e a, koia oki ko Nuti Reni, Autereria, Paratane e Papua i reira.
Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?
