Te Karere

PUNANGA NUI MAKETE
Te tuera nei rai te Punanga Nui i te au Po Paraparau no te okooko atu ia tatou e akavaitata atu nei ki te au tuatau o te Kiritimiti e te Mataiti Ou. I na i teia epetoma kare e tuera i te po Paraparau no te mea ko te po teia e raveia ei te Tarere Maine Tiare ki ko i te Are Karioi Nui. No reira ka tuera te makete o teia epetoma a teia Po Ruitoru, no reira me ka inangaro okooko koe a te reira po aravei atu i te Manitia o te Punanga Nui ia Mama Elma. McBirney, me kore ra no tatou e mama kotou ko papa ma, tari ia mai te ngutuare tangata ki te Punanga Nui a teia Po Ruitoru kaikai ei, kia akangaroi mai ana i te tunu kai.

CHRISTMAS IN THE PARK
Ko te Porokaramu Xmas in the Park, te rave ua ia ana i te au mataiti katoatoa, ka raveia te reira a te Monite ra 14 o Titema e ka riro rai e na te Taokotaianga Rotaract e akateretere mai i te reira porokaramu. Ka raveia ki ko rai i te Are Karioi Nui e ka tuera te ngutupa i te ora 4.30pm, e ko te tamataora anga i te ora 7pm, e i te ora 9.30pm kua raveia i reira te akaaruruanga paura. Ko te moni turtaki e $5 i te tangata mamaata, $2.50 i te tamariki 12 mataiti aere mai ki raro. Ko te umu Tapura no teia Porokaramu koia oki White Christmas – Kiritimiti Kiona, no reira aere mai rakei ia mai koe kite rakei tau ki te tapura o te reira ra. Ka tae mai a KUKI e pera a KUKUPA a te reira aiai, e ko te pupu te ka tamataora mai koia oki ko te pupu o te Filipino, Indonesia, Ra Itu, e te Mapu AOG, e ka oko katoa te kai a te reira aiai.

MIRE TIARE
Kua raveia te akatuera anga o te Mire Tiare i te Maanakai ra 05 o Titema ki ko i te Punanganui e kua riro e na te Minita o te Tauranga Vananga ko Hon. Robert Wigmore i akatuera i te reira akakoroanga. Kua akaaravei ia mai te au tamaine e rima te ka piri atu ki roto i te Tarere Maine Tiare o teia mataiti i te reira ra katoa, e i te Po ake kua akavaia ratou no ta ratou Karere no to ratou au Turuturu ki ko i te Otera Edgewater.
I teia Ruirua ra 08 o Titema ko te tutaka anga o te au Opati o te Kavamani tei iriiri ia ki te tiare e ko te Tumu Tapura no teia iriirianga, Turou! Oro mai! e rima opati tei piri mai ki roto i teia tuanga, koia oki te Opati o te Justice, Revenue Management, Tuanga o te Turoto, e te Opati o te Tauturu Para Minita.
A te po Paraparau ko te Tarere Maine Tiare ki ko i te Are Karioi Nui, ka akava ia te anau tamaine no ta ratou peu karape, pona pareu, paupau uianga e ka akakorona ia rai a Maine Tiare i te reira po.

Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?