Te Karere
ORONGA’ANGA AKAIRO KI TETAI AU TANGATA MEI KO MAI I TE ARIKI VAINE O PERITANE
Kua akapapu ia mai e te Opati o te Kauono o te Ariki Vaine o Peritane o konei teia au tangata kua akatinamou’ia ratou I tetai au akairo no te mataiti 2010. Ko teia au tangata ko te Mema Paramani a Ngamau Munokoa; Tiriakau Vakapora Nicholls, Mangele Malo e Metuakore Teremoana Kora no ta ratou tu’anga angaanga meitaki tavini I te iti tangata e pera katoa I te tuatau I angaanga mai ana ratou I roto I te Kavamani e pera I roto I te Evangelia.
Ka rave’ia te oronga’anga I to ratou au akairo I teia nga ra e tu mai nei I te ngutuare o te Kauono o te Ariki Vaine o Peritane I Titikaveka. Kare oki e tuatua papu I no te ra e rave’iai teia akatinamou’anga.
TUEPORO TARAPE NA TE VAINE O KONEI
Te akateateamamao ia nei tetai tarekareka tueporo tarape na te au vaine I raro ake to ratou mataiti I te 20. Ka riro oki ratou I te mata atu I te basileia ki tetai tarekareka tueporo tarape maata I Nuti Reni akamata I te ra 17 no Tianuare. Te pupu ka autu mai ki teia tarekareka ka piri atu ratou ki tetai tarekareka maata na te pa moana Oceania te ka rave’ia ki Tiamani. Te tereni pakari nei oki teia au pupu tamaine e mei te 11 au tamaine e tereni nei mei Rarotonga atu nei, e 4 mei Aitutaki, e 3 mei Nuti Reni mai.
I te tuatau ka putuputu mai ei ratou I te ngai okotai ka ikina’iai te au akaaere o teia pupu tarekareka tueporo tarape o te Kuki Airani raro ake te mataiti I te 20.
MANGA UA TA MA’U’U I TE ENUA
I teia nga ra te kite nei tatou I tetai manga ua I Rarotonga nei e e akairo meitaki teia no te akarava I te vai I tetai au ngai tei ngere ratou I te vai mei a Ruaau e Nikao. Te vai nei oki tetai au ngai I Rarotonga nei te akaravarava ia nei te tuku’anga mai I te vai ki roto I te au ngutuare mei ko atu I te pu paipa mei te oire Ruatonga, Takuvaine e Tauae. Te tamate ia nei oki te vai ki teia au tu’anga oire I te tuatau po e kua tukuna akaou ia mai I te tuatau marama. Te tamata pakari nei oki te Tuanga o te Vai mei konei atu I te Tipatimani o te Pae Angaanga I te tama meitaki I te au pu paipa takapini I a Rarotonga nei I te au ra tatakitai kia ma meitaki tei reira e te irinaki’anga e kia maata ua mai te ua I teia nga ra rava kore o te vai
MAPU E 50 KA MATA ATU I TE BASILEIA NO TE ANGAANGA A TE MAPU
Mei te 50 au mapu tane a pera te mapu vaine te ka mata atu I te basileia I tetai rotai’anga maata a te au mapu no te taime mua. Ka rave’ia oki teia iriiri kapua ki Akarana akamata I te ra 15 – 20 no Mati I teia mataiti te ka akateateamamao ia mai e te taokotaia’anga tarekareka tuaporo tarape o te pa moana Oceania. Ko te vaerua maata oki I riro ei e na teia taokotai’anga e akateateamamao mai I teia iriirikapua I te akariro’anga I te tarekareka tipoti ei ravenga I te akamatutu uatu I te oraanga kopapa tau no te mapu.
E 8 I teia au tamariki nei mei Atiu mai, Mitiaro, Mangaia e ko te maata’anga a ratou mei Rarotonga nei. Te riro nei oki e na te tuanga Mapu mei roto atu I te Tipatimani o te Tango Ropi’anga(Internal Affairs) e akateateamamao nei I teia tarekareka
TUATAU E AKATUERA AKAOU EI TE APII NO TEIA MATAITI 2010.
Tei roto rai te tamariki i te tuatau orote no te Kiritimiti e pera te mataiti ou inara, e 3 o ratou epetoma toa kua tanitu akaou te apii. Ka akamata te tuanga mua o te apii no teia mataiti i te ra 25 no Tianuare 2010. Ka orote atu i reira te tuanga mua o te apii no teia mataiti i te ra 16 no Aperira e rua epetoma orote akaou. Ka tamata te tuanga rua o te apii no teia mataiti i te ra 3 no Me. E 4 oki tuanga apii i te au mataiti e ka taopenga te apii no teia mataiti i te ra 10 no Titema 2010.
IRIIRI KAPUA NA TE ARONGA RAVE ANGAANGA MAMAATA I ROTO NEI I TE BASILEIA
Kua rave iatu tetai iriiri kapua na te aronga e angaanga nei i roto i te tu’anga turoto ki ko i te Otera Edgewater i Arorangi. E vaa tuatua ta ratou tei tae mai no teia iriiri kapua koia a Eric Ngan, e Manitia aia no te tuanga Tarekareka e te Akatutu mei roto atu i te Konitara o Akarana. E 15 oki ona mataiti i teia tu’anga angaanga no te akateateamamao i tetai tu porokaramu na te Konitara te ka tae tona turanaga i teia nei ao te au tu rava rai e pera katoa te kimi tauturu no te rave’anga i teau au angaanga. Kua piri atu oki ki teia iriiri kapua ratou e riro nei i te akateateamamao i tetai tu porokaramua mamaata i roto nei i te basileia mei te Maire Maeva Nui. Kua ngakauparau oki aia i na Eric ei i teia tika’anga kua rauka iaia i te akaari i tona marama no runga i tana e rave nei i tona irinaki’anga e kia riro teia i te tauturu ia ratou tei tae atu no runga i ratou tu’anga e rave nei.
Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?
