Te Karere

KA AKARUKE TE AKAAERE O TE TUANGA TUROTO I TANA ANGAANGA
Kua akakite te Tama Akatere Au o te Kopapa Akateretere o te Tuanga o te Turoto a Tata Crocombe i nanai, e kua tuku mai te Akaaere o te Tuanga o te Turoto a John Dean, i tana peapa akakite e ka akaruke aia i tana ngai angaanga, i roto i te toru marama e tu mai nei. Kua akakite a Crocombe kare e roa ia atu ana ka tuku ia mai i reira te akakiteanga ki te katoatoa tei inangaro i te apai i teia tuanga angaanga.
Kua akakite a Dean e kare aia manamanata ana no teia tana i rave, no te mea i tona akamata anga i te angaanga ki runga i teia turanga, kua akakite aia e ko tona manakonakoanga kia rauka tetai rereanga pairere tika mei Sydney ki Rarotonga nei, e kua tupu te reira e te akamata nei i roto i te marama ko Tiunu.
POTI TUTAKA NA RUNGA I TE TAI ROTO
Te inangaro nei a Conrad Hunter i te akamata atu i te akatere i tona poti tutaka na roto i te tai roto ko te Koka Lagoon Cruises, tukeke i nana ei te au akanoonooanga tutaka te ka raveia e pera katoa oki te tutaka i te aiai po. Ko teia poti nei e io to raro i te papa, ka kite atu koe i reira a roto i te tai mea po, nana rai oki i maani i teia poti nei. E mori rai to raro i te papa o teia poti nei e kare ra oki i papu meitaki te tuatau e rave ia ei te akatapuanga o teia poti nei.
E MEA TAU AINEI KIA NOO RAI TE PARA MINITA E TONA RURU MINITA KIA AKAAERE I TE BASILEIA
Ko te uianga teia tei uri ia ki runga i te porokaramu karangaranga e tai ora a te Ratio Kuki Airani i teia popongi. Ko te maata anga o te tangata tei ringi atu i teia porokaramu kua ariki ratou i te manako kia noo rai te Para Minita e tona Ruru Minita e tae uatu ki te ikianga maata i roto ia Tepetema. Te vai katoa nei te manakonako anga o tetai pae e kia riro e na te iti tangata e iki e koai te Para Minita.
Ko tetai au manako tei oraora ia mai koia oki, eaa i rapurapu ia ei te raverave anga no te akatukeanga i te turanga poritiki i roto nei i te basileia, e oti akera teia rai tetai au tuanga puapinga no te basileia e ka inangaro ia kia raveia mei te turanga o te mataara, te vai, te pai e pera te apii.
KA INANGAROIA TE MONI KARE I TAANGAAANGA IA ANA O TEIA AU MATAITI I TOPA
Te inangaro nei te Minita o te Ture a Apii Piho i te tuku atu i tetai patianga ki te Ruru Minita no tetai tikaanga kia rauka i te Tuanga o te Ture i te taangaanga i ta ratou au moni toe o teia au mataiti i topa tei kore i taangaanga ia na, kia rauka i te akapou atu ki runga i te akameitaki anga i te Are Auri i Arorangi. Te inangaro ia nei kia akarakara akaou ia te turanga o te are auri, no te kai, pamu no te vai, tetai matini taau vai e pera tetai au apinga ke atu tei inangaroia. Ko te vaerua o teia patianga kia riro rai e na te Tuanga o te Ture e taangaanga i teia moni toe, kia kore te Tuanga o te Moni e tuku atu i teia moni ki tetai Minitiri ke atu o te Kavamani.
TUEPORO TAKIITU I PONEKE – WELLINGTON
Kua rauka te akapapuanga e kare te Kuki Airani e piri atu ki te Tarere Tueporo Takiitu te ka raveia ki Poneke – Wellington, Nuti Reni i te epetoma mua o Peperuare. Kare oki te Kuki Airani i manuia mai ana i te Tueanga Poro tei raveia ki Tahiti i te marama ko Noema i te mataiti i topa kia rauka ei i te tue atu ki roto i teia tarereanga i Nuti Reni, i akakite ei a Ben Koteka o te Taokotaianga Tueporo o te Kuki Airani.
MIRE TAPATI A RAPA NUI
Kua tae mai te patianga kia Pa Marie Ariki kia tae atu ki te Mire Tapati a te Enua Rapa Nui te ka raveia mei te ra 01 – 14 o Peperuare 2010, e ka aru atu iaia koia oki a Stephen Peyroux o Takitumu. Ka akaruke atu raua a te ra 30 o teia marama, e ko to raua tere i akakite ei a Pa Ariki, ko te akapouanga katoatoa kua tutakiia te reira, kia tae raua ki Tahiti ka kapiti ia mai raua e te tetai o tana tamaiti, ko ratou i reira ka tere atu ei ki Rapa Nui.
Ka tae atu ki teia Mire Tapati tetai au mata no te enua Nuti Reni, Autereria, Tahiti, Vaii, Niu Karitonia, Samoa, Tonga e te vai atura. Te rekareka nei aia i na Pa Ariki ei koia tei patiia mai kia tae atu ki teia akakoroanga no tona turanga Ariki no Takitumu.
AKATUKEANGA I TE TURANGA PORITIKI O TE BASILEIA
Kua uipa akaou atu te Para Minita i teia ra kia Iaveta Short e Tata Crocombe no te akarakara atu ki roto i te tereanga no te au akanoonooanga no te akatukeanga i te turanga poritiki o te basileia. Kua pou rai ia ratou teia popongi i te uipaanga e i roto i te reira uriuri anga manako kua akara katoa ratou no te akao atu anga ki roto i te Ikianga Maata o teia mataiti tetai ikianga no runga i to te iti tangata ikianga manako no runga i te akatukeanga i te turanga poritiki o te basileia e ko tei ariki ia e te maata anga o te iti tangata.
APII PUKA TAPU
Ka raveia tetai Apii Puka Tapu a teia marama ki mua, tei akanoonooia e Ken Ben te Akaaere o te Tutu Evangelia o te Akonoanga Keritetiano o te Kuki Airani, e kua tere atu i te 100 tangata tei retita atu no teia apiianga nei. Kua akakite aia mea akaoti mai teia apii nei, ka marama te au tangata tei tae ki teia apii i te turanga o tetai au 77 au tangata tei taiku ia ki roto i te Bibilia, e ka riro te au takaianga ta ratou i aaere i roto i to ratou oraanga ei akaraanga na te katoatoa.
Kua irinakiia e ka riro teia apiianga nei ei akamou i tetai turanga matutu i roto i te akarongo, e ka tuera teia apiiangaa ki tetai uatu o te au akonoanga Evangelia Keritetiano
Apopo ka akaruke atu a Ken no Athens i Greece no tetai rua epetoma apii na te au Akaaere Tutu Evangelia o teianei ao.
RIPOTI NA TE AKAVA
Mei te Paraparau mai i te epetoma i topa e tae mai ki te ra inanai, e tai ngauru au tangata tei opu ia atu e te akava, i akakite ei te akava ko Nga Pouao. E a i teia au tangata nei kua maata roa te vaito o te kava i ta ratou i inu, e ko tetai kare aia e tika ia kia akaoro no tetai tai ngauru ma rua marama, e toru ka tu atu ratou ki roto i te Akavaanga no to ratou au utunga. E toru o teia au tangata kua akaapa ia ratou no te akaoro noatu e kua tipuia to ratou tikaanga akaoro, ko tetai no te ta vaine, ko tetai e keia e ko tetai no tei kitea ia mai e maruana.
TUEPORO TARAPE
Apopo kua tue atu i Nuti Reni te Pupu Tueporo Tarape o te Kuki Airani no te tuanga o te vaine i raro ake i te ruangauru mataiti i ta ratou tueanga mua ki te pupu o te Tonga, no tetai ngai no ratou kia o atu ki roto i te Tueanga Tarape o Teianei ao no te tuanga o te Vaine raro ake i te ruangauru mataiti.

Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?