Te Karere.

Te turanga o te vai I Rarotonga nei
Te akakite nei te taunga maata o te vai I roto I te Kavamani a Adrienne Teotahi e me kare e ua I teia nga ra e tu mai nei te teateamamao nei ratou I te tuku atu I tetai au vai ki te ngai kakapo vai ka ngere I te vai I Rarotonga nei. Kua kitena ia mai oki e ko Turanga tetai tuanga e ngere maat anei I te vai; koratou tikai e noo nei I te au ngai teitei. E me kino uatu rai te turanga ngere o te vai I rarotonga ka akapakari tona Tipanimaniii te ture no te aka-utunga ia ratou ka kitena ia mai e kaimoumou nei I te vai.
Ko te tuatau meitaki oki I topa ei te ua I Rarotonga nei I te taime I u ei tatou I te uri’ia Nisha I te marama ko Tianuare; e mei reira mai I na Adrieen ei kare e ua meitaki I topa ana I Rarotonga nei. E tuatau maro oki teia ta tatou e kite nei I te te tumu e ngere nei tatou I te ua e ko te taime openga I kite ei tatou I tetai tu manamanata no te vai mei te mataiti 2004 – 2005.
Te turanga oki o te reva no teia ra ka tap ate ua I tetai au taime I na Teotahi ei e, kare ra oki teia e rava. Te tama pakari nei oki tona Tipatimani I te au pu paipa vai takapini I a Rarotonga nei e te pati pakari nei te tangata maata o te vai I roto I te Kavamani I te iti tangata kia taporoporo uatu rai I te ta’angaanga anga I te vai e kia akakite vave mai ia ratou I tetai au paipa vai e kua atiati me kare e aeare nei te vai mei roto; kia taniuniu atu I te numero 26 – 634.
KARE TE PARAI MINITA E ANOANO ANA I TE KAPIKI I TE PARAMANI
Kua akakite te Parai Minita a Jim Marurai I te tuatau o tana uipa atu anga I te au tu nuti I Rarotonga nei mei te nuti pepa e te TV, ratio e kare aia e kite ana I te tumu tau kia kapiki aia I te Paramani no tetai uipaanga. Noatu oki e kua akakite te arataki o te akaaere mei te tua patoi a Terepai Maoate e kia kapiki ia te Paramani no te akara atu I te turanga tauturu ia Aitutaki ko ratou tei u I te uri’ia Pat I teia nga epetoma I topa.
E pau nei oki a Timi a te kite atura aia I te vaerua mei ko mai ia Terepai Maoate kia matutu akaou mai tona turanga arataki ki roto I te iti tangata. Kia meitaki ua aia I na Timi ei. Te karanga nei oki a Timi e kua ariki tona ruru Minita e kare aia e kapiki I tetai uipaanga I mua ake I te marama ko Tepetema I teia mataiti. Ka rauka oki I te Kavamani I te ta’angaanga I tetai tuanga moni mei te Kavamani Nuti Reni ara atu I te 11 mirioni tara marike ta ratou ka rauka I te pati no te tauturu I a Araura tei u atu I te uiri’ia Pat. Te vai ua nei oki teia pute moni a te Nuti e akakite nei a Timi ta te Kavamani ka rauka I te ta’angaanga.
I roto oki I tana karere ki te au tu akakitekite’anga nuti e te akara matatio nei aia e me kare e turu no tana Kavamani no teia tuatau e tu mai nei e ka rauka iaia I te kapiki viviki I te Paramani kia uipa e ka akakite ei aia I tetai iki’anga poitirere no te are Paramani
TE TURANGA APII I AITUTAKI MEI TE URI’IA PAT MAI
Ka tuera te apii I Aitutaki no te taime mua mei te u’anga ratou I te uri’ia Pat I teia Ruitoru e te akakite nei te taokotai’anga Red cross e ka oronga atu ratou I tetai ariki’ang akapu ti kit e au tamariki apii kia matutu ratou. Ko teia au apii oki ko te Apii Tuatai o Araura, Apii Tuarua Araura, te Apii Tuatai o Vaitau e te apii tuatai a te Akono’anga Ra Itu.
Mei te tai marama teia ariki’anga inu kaputi na te Red Cross e akakite nei a Nikki Rattle kia rauka I teia au tamariki apii tetai turanga akaou kia maroiroi ratou I te oki kit e apii e kia api ke I te vaerua ta ratou tatakitai I tomo atu na roto I teia uri’ia Pat.
Ka riro katoa teia I na Rattle ei I te akamatutu katoa I te au metua no te apii a ta ratou tamariki e oki nei I te apii no te taime mua