Te Karere

Te vai nei rai tetai turanga matangi pakari I rotopu I a Rarotonga e Mangaia.
Te akakite nei te tangata maata o te ngai akara’anga reva e ko te tu matangi ririnui ta tatou e kite nei I teia au ra I Rarotonga nei e pera a Mangaia no tetai ko’u reva kinokino e aere kapipiti nei pera te pakari o te matangi tea ere uatu nei rai mei te akamatakite’anga kou reva kinokino 11F.
Ko teia matangi kinokino oki mei te 25 – 30 kiro metera te ririnui, me kare ara atu I te 60 kiro metera te ririnui ta tatou I kite I teia openga epetoma. Te akamarama nei oki a Arona Ngari e ko teia reva kino ka vai uatu rai tei reira no tetai nga ra e tu mai nei. Ko te tai akaki ta tatou I kite I teia openga epetoma kua tae mai tona tuatua I te ora 8 I te aiai Varaire e kua akamata tona aronga angaanga I te akara matatio I tona kavenga e, I te turanga me tae tei reira ki tetai maata’anga; e kua akamata katoa I teatea I au ravenga akamatakite’anga kit e iti tangata.
Te Mire Atu I te openga I te marama ko Mati
Kua akapapu’ia I teia nei te ra e rave I’ai te Mite Atu o teia mataiti koia oki I te ra 31 no Mati, e akakite nei te taunga maata o teia tarere imene a Rutera Taripo. Kua vao iatu oki teia no te au akakoro’anga kimikimi moni no te akakoro’anga o Araura enua. Kua akapapu katoa mai oki a Rutera e ko te au ‘aito no te Mire Atu I teia mataiti ko Upokoina Teiotu, Tuaine Unuia, Glassie Matara, Poti Maeva, Teariki Adam Travel Moeara, Tuakana Makara, Curly George, Tuwunga Mataora, Tuakeu Harry-Papai e te aito o teia mataiti I topa te orometua a Eliu Eliu.
Te tarekareka patupatu poro ta te YWAM e akateateamamao nei
Te akateateamamao nei te putuputu’anga YWAM I tetai tarere patupatu poro e tai rai te ka reva’ia I te ra 13 no Mati. E ra katoa teia kia mataora te au ngutuare tangata tatakitai te akamaroiroi ia nei kia tae mai. E au akairo na roto I te moni ta ratou I teatea I te akamauruuru I teia akakoro’anga. Ko te moni tutaki I te au pupu ka tomo mai ki roto I teia tarekareka e $40.00 I te pupu e ko te pupu ka autu I teia tarekareka ka oronga’ia ki aia e $350.00 akairo no to ratou maroiroi. Ko te akairo no te re 2 o te pupu ka autu e $150.00 e ko te re 3 e $100.00.
Ko tetai uatu tei anoano I te tomo mai ki roto I teia tarekareka kia taniuniu atu Edie ki ko te ngutuare o te YWAM I Titikaveka.
Tu turanga o te Akava I teia akamatakite’anga tai akaki
E mea tau kia oronga ia tetai akameitaki’anga ki te akava no ta ratou I rave I te tuatau o te tai akaki ta tatou I tomo atu na roto I teia epetoma I topa. Kua rauka oki I te au akava I te aravei atu I te au ngutuare e noo nei I te pae ta’atai no teia ngaru akaki e kia neke ratou ki te tua maunga akaruru ei. Kua tomo katoa oki ratou te akava na roto I te au ngutuare e pera te ngai inu’anga kava I te ora popongi roa no teia karere tupu poitirere.
Kua maru katoa te vaerua o te iti tangata I te akaronga’anga ratou I tetai karere pumaana mei konei atu I te tangata maata o te akava koia a Maara Tetava. Tetai karere akapumaana katoa tei akarongo iatu na runga I te ratio mei konei atu I te Orometua maata o te Akono’anga Apostolic a Tutai Pere e pera katoa I te rave’anga I tetai pure akapumaana.
Kua pumaana katoa oki tetai au ngutuare e noo nei I Matavera I te akarongo’anga I tetai au karere akamaroiroi no runga I teia tai akaki e te tuatua iaia e teatea nei kia tae mai ki to tatou tai moana. Kua riro teia I te oronga mai I tetai karere apii e per ate akateateamamao ia tatou te iti tangata me tupu akaou ake tetai tai akaki. Te akakite katoa nei te mema Paramani o te enua ko Pukapuka koia a Peua e kua tuku katoa atu aia I nana karere na runga I te ratio Kuki Airani ki tona iti tangata I Wale “ kia akamaroiroi e kia tuku I te irinaki’anga ki roto I te Atua.” Kua takore iatu oki teia tai akaki na runga I te ratio Kuki Airani I te ora 10.00 e te Akava maata.
Te rotai’anga I te iti tangata Araura I te tuatau o te tai akaki
Mei te 1,270 ngutuare tangata I Araura e pera katoa te turoto tei retita ia ratou ki te taokotai’anga Red Cross na roto I ta ratou porokaramu kia kitena ‘ia te tare tangata o tei reira enua. Ko tetai vaerua maata ta teia taokotai’anga I rave I te akara matatio I te tare’anga o te iti tangata I reira I te tuatau o te uri’ia kia papu ia ratou e tei ‘ea te manotini’anga o te tangata me roko’ia ratou e tetai manamanata natura mei te uri’ia.
Kua oronga katoa atu teia taokotai’anga Red Cross I tetai au kakau maana, te kai e per ate au taporeni ki a ratou tei matuapuru atu I te maunga teitei I Araura I te tuatau o te tai akaki.