Te Karere

AKARARANGI’ANGA I TE AU PAKAU O TE PA MOANA PATIPIKA I AKARANA
E itu au akatutu’anga te ka piri atu I te akararangi’anga I te au pakau o te pa moana Patipika I Akarana tei kapiki katoa’ia e ko te Pasifika Festival. E rave ‘ua iana teia akararangi’anga pakau I te au mataiti. Te akakite nei te tuanga akapuapinga I te au pitiniti o roto nei I te basileia e e 2 I teia numero nei te ka tae atu mei konei mei runga mai tei reira I nga enua I tai mai. Kua tae takere oki tetai pae ia ratou e ko te toenga ka akaruke atu I t era 13 no Mati. Ko tetai mataara oki teia kia rauka mai tetai puapinga na roto I te okooko’anga atu teia au pitiniti I ta ratou ka rauka kit e iti tangata o te moana nui o kiva I Akarana
TE MANAKO E KIA AKATUKE’IA TE AKAORO NA RUNGA I TO TATOU MATAARA
I te mea oki e te teateamamao nei a Nuti Reni I te akatuke I te akaoro na runga I to ratou mataara, te akakite nei ra tetai opati o te akava a Taivero Isamaela e e ngata rai e kia aru tatou I ta Nuti Renie rave nei. Kare tei reira I te angaanga mama I nana ei; ka akatuke te ture e pera katoa kia rave’ia tetai au apii’anga noo runga I teia akatuke’anga I te akaoro na ruunga I to tatou mataara I Rarotonga nei.
Ko te manako oki; kia tauvi te ture kia oronga ia tetai tika’anga no tetai apinga akaoro I te au ngai e ta pu ei te au apinga akaoro. Kua akamata oki a ‘Amoa I teia akatuke’anga I teia nga mataiti e kua kitena’ia mai e e maata uatu rai te au manamanata apinga akaoro u ki runga I to ratou matara e te akakite nei oki a Isamela e ka pera katoa teia me tauvi’ia te ture no tatou.
TE TAOKOTAI’ANGA RED CROSS O TE KUKI AIRANI NEI
Te akakite nei te taokotai’anga Red Cross o Araura e e mea tau kia ariki’ia tetai uatu au kakau a’ao takere mei roto mai I te iti tangata tauturu ia ratou tei ngere I te kakau a’ao. Ko Leon Tuara oki te te mata o teia taokotai’anga e te akakite nei aia e ka rave to ratou taokotai’anga I tetai ‘ra kia akatuera ia’ no tetai uatu kia oronga mai I tetai au kakau takere o ratou no teia akakoro’anga.
Kua tae katoa atu oki I nana ei te pai Gypsy Jac ki Aitutaki no te apai atu I tetai au kai e pera katoa kakau te ka oronga iatu I te iti tangata e kare e tutaki. Ko teia au pakau aroa oki mei roto mai tei reira I te apii Te Uki Ou. Te ngakauparau nei te taokotai’anga kimi moni o Aitutaki I teia rima oronga na te Uki Ou e pera katoa nga pai tai tei ariki kai apai atu I teia au pakau ki Aitutaki e kare e tutaki.
No reira, me e kakau takere aere toou ki roto I te au ngutuare e kare koe e o akaou ki roto no te patu puaka e apai atu I tei reira ki te ngutuare o te iti tangata Araura o Rarotonga nei.
TE AKATAINU’ANGA IA FREDDY KAINA EI OROMETUA KATORIKA
Te akateateamamao nei te Akono’anga Katorika o te Kuki Airani nei I te angaanga maata no te akatainu’atu anga ia Fred Kaina mei Manihiki mai ei orometua no te Akono’anga Katorika. Ka rave’ia tona akatainu’anga ki roto I te are pure maata o te Akono’anga Katorika I Avarua nei e e manganui uatu rai te au Episekopo mei nga enua mamaata I tai mai, te au orometua tei pati’ia e pera katoa te ngutuare tangata o Freddy Kaina mei tai mai te ka tae mai ki teia akatainu’anga.
E angaanga maata teia na te Akono’anga Katorika no te akatao’anga orometua e vaitata rai e ka piri mai te manganui’anga o te au Parokia ki teia akatainu’anga no Freddy Kaina.
Kua aere atu ana oki a Freddy ki Viti no te apii orometua mei te itu mataiti e kua rave katoa atu ana aia I tetau au angaanga atoro I tetai au parokia no te akamatutu iaia no teia takainga maata. Kua roa rai oki te tuatau e kare ake rai o te akono’anga orometua no te tutu atu I te Evangelia ki te manotini’anga o te mema ki roto I te au parokia takapini I te Kuki Airani nei.
TE KAMUPANI AKATU ARE HABITAT
Te akakite nei a Lou Maea o tetai kamupani akatu are koia te Habitat e e mea tau ko te angaanga akatu are akaou I Aitutaki kia akara meitaki ia tei reira. No Aitutaki ana oki a Maea no te akara matatio I te anoano akatu are akaou I Aitutaki e te akakite nei aia e kua kite atu aia e te vai nei tetai au are tei takino iatu I te tuatau o te uri’ia Pat e kare I kino roa e ko tetai pae kua ‘inga takiri ki raroo e mea tau I nana ei kia akatu’ia tetai are ou no teia au ngutuare tangata.
No Amoa ana oki tana kamuani I na Maea ei no te akatu are ki te au ngutuare tangata tei takore’ia to ratou are I te tai akaki I nga mataiti I topa.