Te Karere

AKATAO’ANGA ANGA I TE TIAKONO I A FREDDY KAINA EI OROMETUA KATORIKA
I teia paraparau e tu mai nei tetai angaanga maata n ate Akono’anga Katorika I te akatao’anga anga I te Tiakono I a Freddy Kaina kia riro mai aia ei orometua Katorika no te Kuki Airani. Te akakite nei te Episekopo a Stuart O’Connall e ka rave’ia teia na roto I te pure Tutia maata I te ora 5.00 I te aiai ki roto I te are pure maata o te Akono’anga Katorika o Avarua. Ka apaina iatu oki a Freddy na runga I te pa’ata mei te ngutuare I te pae mai o te akono’anga ki roto I te are pure no te pure Tutia maata. E manganui tei pati’ia kia tae mai no teia angaanga ma’ata a te akono’anga mei te enua mamao e pera katoa mei roto mai I te au parokia Katorika o runga i te au enua I tai mai. A piri katoa mai ki teia akatao’anga anga te perepitero a Lane mei Wai’i mai; I tavini ana rai oki a Lane I te akono’anga I te mataiti varu ngauru.
Kua na roto ana a Freddy I tetai tereni’anga perepitero e ono mataiti I Viti e okotai I konei no te akateateamamao iaia kia riro mai aia ei orometua Katorika. Ka akamata te pure Tutia no Freddy I te ora rima I te aiai.
KUA RIRO TE AU REPO KINO I ATIA I TE TA-MANAMANATA I TE RERE’ANGA PAIRERE
Ko te repo kino na roto I te aka-aruru’anga o tetai maunga I Atia kua riro teia I te tamanamanata I te rere’anga pairere I teia au basileia nei I Atia e kua akatuke katoa I te rere’anga pairere takapini I teia nei ao e I te Kuki Airani katoa nei no te pairere okotai taime I te epetoma e rere ana I LA, Marike. Te akakite nei te manitia o te ona pairere Nuti Reni o konei a David Bridge e mei te 20 au tangata teia tamanamanata iatu to ratou rere’anga ki LA no teia I te maanakai.
Te akakite nei oki te taokotai’anga na ratou e akarakara ana I te turanga rere’anga pairere o teia nei ao mei te United Kingdom e penei ka maru mai te turanga o teia repo kino I roto I te mareva I teia ra me kare apopo. Te akamatakite nei oki ratou I te au tangata e akateateamamao’anga to ratou kia rere pairere I teia au ra auraku kia rere kia rauka roa mai tetau tuatua papu. Te akapapu katoa nei oki te ona pairere Nuti Reni e e ko te au tangata tei tamanamanata ia to ratou rere’anga pairere e na kotou rai e tutaki I te moni tuke no to kotou patete. I teia tuatau katoa oki e me kare tei reira tangata e anoano ana I te rere pairere I teia tuatau ka akaoki iatu ta kotou moni tei pou ki runga I te tutaki’anga I to kotou ngai I runga I te pairere.
TE VAERUA TUKE MEI TO TATOU ITI TANGATA MAI I AKARANA NO RUNGA I TE TAUTURU NOOU E ARAURA ENUA
Te akaari nei tetai pae o te iti tangata e noo nei I Nuti Reni I to ratou mareka kore I te porokaramu akapuapinga noou e Araura mei te u’anga mai kotou i te uri’ia I teia nga marama I topa. Kua tae atu ana oki tetai au arataki mei Aitutaki mai I Nuti Reni no te atoro I te iti tangata ma te pati tauturu e I na roto I tetai uipaanga tei rave’ia I reira kua akakite’ia ki teia uipaanga e ko te moni tauturu a te Nuti Reni mei te 5.5 mirioni tara kua roka iatu tei reira e te kavamani o teia ra – e’aa te tumu e ‘ui ia nei teia ui’anga ki roto I te uipaanga.
I roto I tetai nuti a te ratio Nuti Reni I teia popongi Ruirua te akakite nei tei reira e kia riro te Kavamani Nuti Reni I te opara uatu I te angaanga akapuapinga ki ta tatou Kavamani noou e Araura e auraka ratou e noo ua. Te akakite nei oki teia ripoti na te ratio Nuti Reni e kia akamanako rai tatou I te turanga o ratou e noo ua maira ki runga I te au ngutuare ki’e e te tuke I tei reira ora’anga e noo mai ra ratou. Te akakite nei ra te tama akatere ‘au o te taokotai’anga kimi moni noou e Araura koia a Tioti Tioti e ka rave iatu tetai uipaanga na ratou kit e Konitara Tutara o Araura koia a Tai Herman I te uriuri tuatua e ka akapeea te tu’atu’a anga I te maroiroi o te iti tangata I te tuatau I rave’iai te angaanga kimi moni? Te mareka katoa nei oki a Tioti I te akapapa’anga moni a teia taokotai’ang ai te mea e kua oti tei reira I te akarakara’ia ma te tau.
AKATEATEAMAMAO’ANGA NO TE RA O TE AU VAE’AU
Kua akamata I teia maanakai I topa te okooko I te ripene poppy ia tatou e akateateamamao nei I te ra no te au vaeau a teia Tapati e tu mai nei. Te okooko ia nei tei reira ki roto I ttetai au are toa I rarotonga nei e pera kato aki roto I te au pangika e ki ko katoa I te ngutuare o te vae’au I Nikao koia te RSA. Ko te moni ka rauka mai no teia okooko’anga ka riro tei reira I te tauturu au vae’au e pera katoa to ratou au ngutuare I te au ra o to ratou ora’anga. Ko ratou oki tei aere atu ana I te enua mamao I te tuatau o te tamaki.
TE RAKAU REVA A TE ARIKI VAINE KA TAE MAI KI KONEI
A teia marama e tu mai nei te akateateamamao ia nei te tae’anga mai I te reva rakau o te Arki Vaine o Peritane te ka oro’ia ki Rarotonga nei e ki runa I te tetai o te au enua I tai mai. Ka tae mai teia reva rakau I te Varaire e te akakite nei tetai mata mei ko mai I te taokotai’anga Tipoti e ka oro iatu teia rave rakau na roto iakoe e Puaikura e ka taopenga atu I te ngai tarekareka BCI. Kua tukuna iatu oki tetai karere kit e au oire takapini I a Rarotonga nei kia tuku mai I te au ingoa no au aito ka kave atu atu I te rave rakau I te tuatau e oro ei takapini I a Rarotonga nei.

Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?