Iki’anga ia Vaipo Kavana ei pava no te puna Ivirua, Mangaia

E angaanga matau na A’ua’u enua me takake atu tetai pava o nga puna I runga I a Mangaia e akakite nei te va’a tara o te enua ki teia iki’anga te Kavana a Mataora Harry.
Ka rave’ia teia na roto I tetai akaue’anga ki roto ia koe e Auau enua; ka ta te puaka, ka oro te poke e ka kiriti te mamio no teia iki’anga. Te vai nei te pupu I roto I te puna ko ta ratou angaanga tei akatu’anga’ia koia oki ko te pupu kiriti mamio, ko tetai pupu ko ta ratou tu’anga e akateateamamao I te umu e ko tetai pupu ko akateateamamao mai I te akari maro e pera katoa te va’ie.
Ko te mea kata I teia akono’anga na te Mangaia me e pai taro taau ki roto I te puna e te akameremere uara koe no te akaipoipo I taau tamaine I teia nga ra e tu mai nei I te tuatau o teia iki’anga pava ka tae mai te tangata ka kiriti I teia pa’I nei naau e kare koe e tamanamanata atu. Ka kiriti ratou mei te rua, toru me kare e mamio mei runga I teia pai taro naau. Kua akateateamamao ake I reira nga Puna I ta raua takurua no teia iki’anga na roto I te akateateamamao’anga I te umu; te oro I te poke e pera katoa te mamio.
I te ora maiata roa kua neke atu I reira nga puna ki te Puna Ivirua no te apai atu I ta ratou takurua. Te vai nei oki te au ko’u kai apaina iatu ki te takurua akaputu e pera katoa ka tu’a iatu ki roto I te au oire. Ko te aite’anga o teia takurua I te akaoki I te akameitaki a te Kavana tei takake atu ki te iti tangata.
Me rota’I mai te au puna ki te ngai o te akatainu’anga tei roto te au angaanga I reira I te rima o nga ono o Mangaia. I te mea e kare e ariki ki runga I te enua ka riro te tangata mono I te mata iaia ki teia akakoro’anga e pera katoa tetai uatu Kavana kare I reira.
Mei teia I reira te tu I te iki’anga Kavana I Mangaia e akakite nei a Mataora Harry:
1. Ka tuku mai te Puna I ta ratou ingoa I te tangata ka tano e ka riro te toenga I te au Kavana I te uriuri me ka tano rai teia tangata tei tamanako ia mai
2. Me tangata mou Evangelia aiai,
3. Me e tangata va’a tukatau aia,
Kua rave’ia I reira te akatainu’anga o teia Kavana te ka riro katoa na te kauono o te Numangatini Ariki e pera katoa te toenga o te au Kavana ka tuku I to ratou rima ki runga I te upoko o teia tangata te ka akatao’anga’ia. Na te Orometua o te oire e rave te pure’anga nona I reira. Na te mono me kare na te Ariki e rave I te akatao’anga’anga. I muri ake I te akatainu’anga ka tuku mai tetai mata o te aronga mana I tetai reo porokiroki I teia Kavana tei ikina’ia e I muri te akararangi’anga a te puna nona.
Ko te tu’anga openga I te tu’a I te au takurua tei akaputu’ia na te tangata katoatoa o roto I te au Puna tatakitai. Ka oki ake, ka oki ake nga puna ki to ratou e ka tu’a atu ei I te takurua ki te manotini’anga o te iti tangata

Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?