Te Karere

E NGAO RAVA OA TE APINGA AKAORO I RUNGA I TE ARANUI
Te akakite nei te akapapa’anga no te tare’anga tangata o te mataiti 2006 e e manganui uatu rai te au apinga akaoro I runga I to tatou mataara I teia ra. Vaitata rai oki I teia tare’anga numero me akapapa ia teia au apinga akaoro nei ki runga I te mataara ka takapini tei reira I te enua e kare e rauka I tetai uatu tangata e aere ki tetai tua I te mataara, I Rarotonga nei tikai.
Teia I reira te au tare’anga:
Te au patikara matini - 5,555
Motoka - 1,911
Motoka Van - 375
Toroka - 738
Toroka pi’a - 493
Patikara takatakai - 2,388
I Rarotonga nei, e 3,558 au patikara, e 1,740 motoka, e 335 motoka van, e 603 toroka, e 366 toroka pi’a, e e 1,685 patikara takatakai. Ko tetai mea kia poitirere koe e tatau nei I teia mea nuti e 22 motoka i rungai te enua ko Nassau, e oti akera e 77 rai tangata I Nassau. I Pukapuka anake ua e 126 patikara matini e eaa to kotou manako I te taime ta’ii e te manamanata o te mataara I runga I a Pukapuka.
KO ‘AI MA TE TUTAKINA ‘IA NEI I TE MONI MA’ATA
Te kitena katoa ia mai I roto i te Tare’anga Tangata o te mataiti 2006 e au tangata te koi nei ratou I te moni ma’ata. Ko teia tare’anga tangata e ko to ratou mataiti mei te tai ngauru ma rima aere atu ki runga (ko te uki mataiti angaanga teia) e 10,622. I teia numero neie 1,589 kare a ratou kimi’anga ravenga – kare ratou e koi moni ana. Tei te irinaki paa ia mama raua ko papa; vai’o I te au metua meitaki. Mei te 2,209 au tangata tei kitena’ia mai e koi nei I te moni I te mataiti I raro ake I te $5,000.00.
E ko tetai au nuti mataora, e 82 au tangata e koi nei e $80,000.00 I te mataiti. Kua kite ainei koe e ko’ai ma teia aronga? Ko tetai I roto I teia pupu tangata nei k otona mataiti tei rotopu I te 25 ki 29 mataiti. E toru au tangata I roto I teia pupu nei e koi nei I rotopu I te $70,000.00 ki te $79,000.00. Ko te mea taitai’a ko te maata ‘anga ia tatou vaitata rai e te koi nei tatou I te moni angaanga I raro ake I te $30,000.00 e e manganui rai tetai au tangata te koi moni nei I raro ake I te $20,000.00 I te mataiti. E mea akaroa teia I te mea e oko ma’ata te au apinga I roto I te toa e pera katoa te moni ma’ata o te ‘a’I uira e te vai atura.
E ITI TANGATA AKONO PURE TATOU
Ko te akono pure I roto nei nei I te basileia vaitata rai e ko koe e piri nei kit e karapu tarekareka tipoti. Te akakite nei oki te akapapa’anga tare’anga tangata o te mataiti 2006 I te numero tangata e akono pure nei akamata te mataiti I te rima mei teia te tu:
Akono’anga CICC - 8,065
Akono’anga Katorika - 2,599
Akono’anga Ra Itu - 1,154
Akono’anga Momani - 565
Akono’anga AOG - 558
Akono’anga Jehovah Witness - 325
Akono’anga Apostolic - 310
Akono’anga Pukuatu Tapu - 92
Presbyterian - 85
Tetai uatu Akono’anga - 609
Mei te rima anere e itu ngauru ma iva tangata e karanga nei e kare ratou e piri ana ki tetai uatu akono’anga e pera katoa mei te toru anere e varu ngauru ma toru I a au tangata e kare a ratou akataka’anga me te akono pure nei ratou.

Herald Issue 463 10 June
- World famous activist assisting residents
- Budget will decide if residents prosecute Government over landfill
- Forestry project sucking Mangaia dry
- Budget 2010 – fiasco or disaster?