Te Karere

Kimi moni na te iti tangata Manihiki no Araura
Na roto I ta ratou akateateamamao’anga kua rauka I te Konitara Enua o Manihiki mei te rua ngauru ma tai tauatini tara I teia varaire I topa moni tauturu I te iti tangata Araura ko ratou tei u I te Uriia Pat. Ka rave katoa’ia oki tetai uipaanga na te iti tangata Manihiki I Rarotonga nei akamaroiroi ia ratou kia turu katoa mai I teia kimiki’anga moni. Kapiti katoa atu ki teia kimikimi’anga moni na ratou tetai tauturu kit e iti tangata Tongareva; ko ratou oki te u atu I te uri’ia Oli.
Te porokaramu aka-meitaki I a Araura mei te uri’ia Pat
Te akakite nei te tangata ma’ata o te Opati o te Minita a Smiley Heather e ten eke nei te angaanga kit e rua o te takainga no te akameitaki atu I a Araura kia rauka akaou te tu ki runga I to ratou vaevae. Kua tae atu ana oki te Minita e tona pupu vaeau no te akara matatio I te au angaanga tei rave iana. E rua oki nga ripoti tei tukuna ia mai ki vao e kare e aiteaite ana te au manako e kitena mai nei no runga I te takinokino ta Pat I rave ki Araura e te riro nei I te aka-vaia I te Kavamani e pera katoa te taokotai’anga Red Cross.
Te angaanga kapiti nei oki te kopapa metua ko ratou te akara matio nei I te au kino ta te uri’ia e akatupu ana koia te Emergency Management kit e au taokotai’anga mei tai mai no te akapapu’anga e kia tae te au tu tauturu kit e iti tangata tei roko’ia ratou e teia tumatetenga ta te uri’ia Pat I akatupu.
Te peu tupuna ‘I tetai tuatau I runga I te akau”
Ko tetai tua takere o te basileia ka akatutu iatu tei reira no te taime mua I Akarana a teia maanakai. Te akakite nei te tangata maata o teia akatutu’anga a Thomas Peyroux e 12 ona mataiti I te ‘atu anga I te au imene tei tau no teia akatutu’anga na roto I te peu tupuna e te ngakauparau nei aia no tei reira I te mea te tupu nei tona moemoe’a.
Ka rave’ia teia akatutu’anga I te ngutuare o te Pacific Events Centre I Manukau e, a teia maanakai e rua taime ka rave iatu tei reira koia te ora 2 e per ate ora 8 I te aiai.
Te akamatutu nei a Mangaia no te Uti’anga reva no teia mataiti
Ka rave atu te iti tangata Mangaia o Rarotonga nei I tetai iriiri’anga kapua ki te taunga a Mataora Harry no te akateateamamao ia ratou no te tuatau o te uti’anga reva no teia mataiti. E rua ra oki te roa I teia iriiri’anga kapua e ka akamata atu tei reira I te ora 5 I te aiai kit e ngutuare rai o te iti tangata Mangaia I Tupapa.
Kimikimi’anga moni ‘unga’unga na te au ngai tamataora o Rarotonga nei tauturu I te pute kimi moni no Araura
Apopo I te maanakai te ra openga tei akateateamamao te au ngai tamataora o Rarotonga nei I tetai vaerua kimkimi moni tauturu I ta ratou ka rauka no te iti tangata Araura. Mei te Monite mai I teia epetoma, kua rave atu teia au ngai tamataora o Rarotonga I tetai kimikimi’anga moni ‘unga’unga kia rauka I te au tangata ka tae atu ki teia au ngai tamataora kia atu ma te tae o to ratou ngakau tetai uatu moni ’unga’unga ki roto I tetai kete tei akanoo’ia e teia au ngai tamataora.
Mei te itu oki au ngutuare mei teia tei ariki I teia vaerua tei apaina ia mai e Charlie Rani tana I akanoonoo kia tauturu atu ratou I tetai manga iti ta ratou ka rauka no teia akakoro’anga kimi moni no Araura.
A teia epetoma e tu mai ka rotai teia au ngai tamataora I te ngai okotai no te tare I to ratou maroiroi ka tuku atu ei ki te Kumiti Kimi Moni no Araura
Ka rave uatu rai te Akava I ta ratou akara matatio I te au aronga akaoro makokore I runga I te mataara I teia openga epetoma
Te akakite nei te Akava e ka rave uatu rai ratou I ta ratou angaanga no te akara matatio I te au apinga akaoro na runga I te mataara I teia openga epetoma e I te au ra. I teia openga epetoma oki I topa e manganui te manamanata tei tupu atu ki runga I te mataara mei te u kona kava.
Te akapakari nei oki tea kava I teia akarakara’anga na ratou I te au aronga akaoro kona kava e, me mou koe ka ravena’ia taau raitini akaoro e ka tu atu koe ki mua I te Akava’anga.
Te pati katoa nei tea kava I te au ‘ona Otera kia akava meitaki I te pia moe o ta ratou au manuiri kia kore e ke’ia ia e te aronga e puapinga kore to ratou ora’anga I tea o nei.