Te Karere

AKATUTU’ANGA NA TE TAOKOTAI’ANGA VAINETINI
Ka rave atu te Taokotai’anga Vainetini o te Kuki Airani nei e pera katoa te Punanga Tauturu I tetai akatutu’anga a teia Monite e tu mai nei I te akamaara I te ra no te vainetini o teia nei ao. Ko te tumu tapura oki I teia akatutu’anga na ratou ko te tika’anga tau e te ‘aiteite. Te akakite nei oki a Kairangi Samuela o te Punanga Tauturu e ko teia akatutu’anga ka akamou tei reira ki runga i te au tu manamanata ta te mapu vainetini e kite nei I teia ra e te kino I roto I te ngutuare. Ko te au aito ka piri I roto I teia akatutu’anga ko Uirangi Bishop, Maria Tuoro, Sean Wichman e pera nga va’a tuatua ko Liz Koteka e Ty Connal. E $5.00 te tutaki ki roto I teia akatutu’anga a te monite te ka rave’ia ki roto I te are pure o te Akono’anga AOG o Takuvaine.
Kua oronga te oire Rangiatea e $11,000 tauturu I a Araura
Kua oronga atu te oire Rangiatea e $11,423.00 ki te taokotai’anga kimi moni o Aitutaki. Kua akamata oki teia kimikimi’anga moni I te epetoma I tupu ei te manamanata uri’ia Pat I Araura na roto I te kimikimi moni. Kua oronga atu oki te au ngutuare tatakitai mei te $30.00 e ko au Aitutaki e noo nei I roto I te oire taku $100.00
Kimi moni a te Karapu Tueporo o Avatiu
Ka rave atu te Karapu Tueporo league o Avatiu I tetai kimikimi’anga moni na roto I tea ere atu’anga te tangata ki tetai teata tamataora Alvin e te Chipmunks te ka rave’ia ki te are teata Empire I Avarua. E rua oki tu’anga I teia teata nei e ko te ora mua tei akataka’ia e ora 6 I te aiai e te ora 9.
Piri katoa atu I teia kimikimi’anga moni na ratou te okooko mereki manga e pera te oronga’anga I tetai au akairo ki tetai au tangata ka tae ki te teata. E $10 te tutaki I te tomo ki roto e me anoano nei koe I tetai tiketi naau tei ko tei reira I te au Kumiti Akatere.
Iriiri Kapua na te Mapu I Akarana
Ara atu mei te 400 au mapu ka piri atu ki tetai iriiri kapua na ratou te ka rave’ia I Manukau, Akarana I t era 15 no Mati. Ka tae katoa atu ki teia iriiri kapua nei tetai au Minita e ratou te akaue nei I te ture no runga I te mapu. E 5 ra teia iriiri kapua te ka rave’ia kit e Pacific Events Centre. Ko Vania Kenning te tangata maata ka riro I te apai atu I te pupu mapu ki teia akakoro’anga maata.
Te akakoro’anga o te Apii Arorangi I teia Varaire
Kua oronga iatu oki tetai au puka tata kit e Apii Arorangi e tetai au ‘ona pitiniti o roto I te oire no runga tikai I te ora’anga meitaki e te matutu. Ko te vaerua maata ooki ki roto I teia au puka nei kia apii uatu I te au tamariki no runga I te ora’anga tau. Ka rave I reira te apii Arorangi I tetai ariki’anga na ratou no teia au apinga aroa. Ka akamata teia angaanga I te ora 11.00 I te popongi
Kimi moni na te oire Tupapa
Ka rave atu te oiire Tupapa I tetai kimikimi’anga moni no te tauturu I te pute moni akaoti I te akameitaki I to ratou are uipaanga. Ka rave’ia teia kimikimi’anga moni a teia popongi maanakai e tu mai nei akamata I te ora 7.00 I te popongi.
No reira, me e ngoru toou I te amani kapu ti I teia popongi maanakai e tapiri atu ki te are uipaanga Maraerenga oki I taau kapu ti; tauturu I te akakoro’anga o te oire Tupapa