Te Karere

TARE KAI NO TE TARERE NCEA
Ko tetai uatu tamariki apii tuarua e inangaro nei i ta ratou tare kai no te Tarere NCEA ka rauka mai te reira ki runga i te atui roro uira. Ko te maata anga o te au tamariki mamaata i roto i te Pupu Itu i te mataiti i topa, manga matakutaku rai i te akara anga i ta ratou tare kai, i te mean a ta ratou tare kai e akakite mai me ka rauka ia ratou i te apii atu rai kite turanga o te Apii Tuatoru, mei te mea e te inangaro ra ratou i te apii uatu rai. . E no te au tamariki e kua tuku i ta ratou patianga no te aere atu kite apii ma te turuturuia - scholarship, na ta ratou tare kai e akapapu mai i to ratou turanga me ka rauka rai ta ratou apii ma te turuturuia. I teia nei e ono ngai no te apii atu ki vao mai i te basileia ma te turuturuia e 16 no te apii ua i konei.
AU PUAPII MAATA OU NO TETAI AU APII
Te akakite nei te Maraurau o te Apii, e kua papa ratou no te akamata atu anga i teia mataiti apii, te ka akamata atu a te ra 25 o Tianuare.. Maata rai oki tetai au apii tei inangaro ia tetai au puapii e pera puapii maata, i teia nei ra, kua akaki aere ia teia au ngai va.
Ko te Puapii Maata ou o te Apii Tuarua o Tereora ko TEaea Parima e ko Teremoana Herman Vaine te Tauturu Puapii Maata. Ko te Tiaki Puapii Maata o Tereora i te mataiti i topa a Vae Unuka te Puapii Maata Ou o Arorangi. Ko Nooroa Ingaua koia te Puapii Maata Ou o te Apii Tuatai o Rutaki. E rua nga Puapii Maata Ou i te enua i tai mai, Ko Enoa Raea te Puapii Maata ou o te Apii TUarua o Araura, e ko Teremoana Ave te Puapii Maata ou o te Apii i Manihiki.
PUPU TUEPORO TARAPE 0 TE VAINE RARO AKE I TE MATAITI RUA NGAURU
Ka akaruke atu te Pupu Tueporo Tarape Vaine o te Kuki Airani i raro ake i te ruangauru mataiti no Nuti Reni a teia Maanakai no te Under 20 Football World Cup Qualifiers. Ko teia pupu e au tamariki tamaine no Rarotonga nei, Aituitaki tei tereni pakari mai ana no teia tueanga nei.
E MEA TAU KIA EKE MAI TE PARA MINITA KI RARO
I runga i te Porokaramu a te Taokotaianga Democratic Party tei na runga mai i te ratio Kuki Airani, kua pati ratou kite Para Minita Timi Marurai kia eke mai no runga mai i te Taoanga Para Minita. I roto i te tai ora o taua porokaramu ra kua pati te Peretiteni o teia Taokotaianga a Makiuti Tongia e pera to ratou tangata akakitekite a Sam Crocombe ki te iti tangata kia pati uatu rai kite Kauono o te Ariki Vaine, Sir Frederick Goodwin kia kapiki i te Paramani kia Uipaanga kia rauka i te akakeu i tetai tamanakoanga irinaki kore ki roto i te Para Minita, me kore ra no te pati kiaia kia eke mai no runga mai i teia turanga nei.
I roto i te akamarama anga a te Roia Nuti Reni no runga i te Papa Ture Metua, a Alex Frame, kua akakite aia, kare e tikaanga o te Kauono o te Ariki Vaine kia kapiki i te Paramani i raro ake i te Atikara 29 o te Papa Ture Metua a te Kuki Airani, mari ua i te akakiteanga a te Para Minita me kore a te Ruru Minita. Te akakite nei te Taokotaianga Democratic Party e ko te akamarama anga a te Roia ko Frame, kua tarevake te tatara anga o te reira.
Te rauka nei i na teia Taokotaianga ei i te Tauturu Para Minita tei akaruke ia mai, te ngakau akamoraroki teia nei basileia e pera kite iti tangata Kuki Airani.
APII TAREKAREKA TIPOTI
Kua akaite a Kevin Iro e ko te akanoonooanga no te Apii Tarekareka Tipoti no teia mataiti, ka o mai te au tamariki apii no te Pupu Apii iva mataiti e te Pupu Apii Taingauru Mataiti, i mua ana oki ko te Pupu Apii Taingauru ma tai mataiti ua kite Pupu Apii Taingauru ma toru mataiti ua.
TAUTURU I TE NGARUERUE ENUA I HAITI
Kua akakite a Charlie Numanga o te Taokotaianga Red Cross o te Kuki Airani, i teia atianga kare a ratou akanoonoo anga ake me ka rave rai ratou i tetai angaanga kimi tauturu na Kuki Airani no Haiti. Ka tiaki uatu ratou mea oki mai to ratou Pu Vaine a Nikki Rattle, e reira e rauka ei ia ratou i te aravei atu i to ratou OPati I Viti i te ui eaa te tauturu tei anoano ia te Kuki Airani kia tauturu.
AKARAKARA AKAOUANGA I TE TURANGA 0 TE PORITIKI
I nanai kua aravei atu te Para Minita Timi Marurai ia Iaveta Short raua ko Tata Crocombe no te uriuri atu no runga i te au takaianga e tau no te akara akaouanga i te turanga poritiki i roto nei i te basileia e no te akatupuanga i tetai referendum. Kua manea te au mea tei uriuri ia e ka akapapu ia te reira ki roto i te Uipaanga a te Ruru Minita a teia epetoma ki mua. Ko Iaveta oki tetai o te au Kumiti o te Mataiti 1997 tei akarakara ana ki roto i te turanga poritiki i roto nei i te basileia, e pera a JohnHerrmann e te metuatane ko Papa Ron Crocombe tei moe ake nei. E kua riro ana oki a tata Crocombe i te akaara mai i tetai o teia au tamanakoanga nei. Kua akakite te Para Minita ko tetai o teia au akatukeanga nei, ka inangaroia te manako o te au Mema Paramani, e tei runga ua i te iti tangata kia akakite ki to ratou Mema eaa to ratou manako.
APIIANGA OROMETUA 0 TAKAMOA
Ka akamata te akaou te Apii Orometua o Takamoa a te Monite ra 25 o Tianuare, no tetai torn ra no te akarakara anga ki roto i te akateretereanga o te apii i Takamoa. Monite ra 01 i re3 ira o Peperuare kua akamata tikai i reira te apii, e ka you rai e a mataiti o teia au apiianga ou e pati mai ei ratou i ta ratou apii orometua. I roto i ta ratou au tuanga ka apii ia ratou koia oki no runga i te reo Latino, Ebera, Apii Bibilia e te vai atura. Ko teia au apiianga e tai ngauru ma rua ratou i te katoatoa no Tongarevaa, Akarana, Christchurch e pera no Rarotonga nei.

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009