Te Karere

TE VAINE MUA KA TU NO TEIA ORO’ANGA NO MANIHIKI
I roto I tetai tata’anga na taua pati rongonui I teia nga ra koia te Temo, te akakite nei tei reira e ka tu a maine Rangi Mitaera no Manihiki I teia iki’anga maata e tu mai nei. Koia I reira te toru o te vaine takake I a Mau Munokoa e Ngai Tupa e aka’ari nei I to ratou inangaro kia tu I teia iki’anga maata. Ko Rangi Mitaera I reira te vaine mua ka tu ei mema paramani noou e manihiki mei te mataiti 1965 mai. Ka riro a Mitaera I te kai tamaki atu I a Enere Puna o te pati Kuki Airani e pera katoa a Apii Pihi ka tu no nona uaorai ma te kore e pati.
TE KAMUPANI TELECOM TE TAPOROPORO NEI
Te akakite nei te Telecom Kuki Airani e te turu nei ratou I teia taporoporo e te akono I te tu natura o te Kuki Airani. Te akara matatio nei I reira teia taokotai’anga I ta ratou tita auraka kia titiri mako kore ua I tei reira mari ra ki tona ngai vairanga meitaki. Na roto I teia e tamou nei ratou mei te tai ngauru ma rua au mori natura no te tauturu I te oronga mai I tetai au ‘ai uira ta’angaanga I t era a Iehova I oronga mai.
E AU KAU TAUNGA NUNUI OU TO TE TAOKOTAI’ANGA TUEPORO
Kua rave’ia te uipaanga mataiti a te taokotai’anga tueporo o te Kukii Airani nei I teia epetoma e ko teia I reira tona au kau taunga nunui ou no teia nga mataiti e tu mai nei:
Paterono Te Parai Minita ko Timi Marurai
Tauturu Paterono Manitia o te pairere Nuti Reni Ko
Tavita Ana(Bridge)
Tama akateret ‘Au Ioane Vitimani
Tona Tauturu Puai Vitimani
Tangata Tata Lara Tataraka
Tauturu Mike Enere
Mou Moni Mareko Paraone
Tauturu Mou Moni Tom Willis
E manganui tei tae atu ki teia uipaanga mataiti na ratou e e tai mata ou ki runga I tona kau taunga nunui koia a Mike Enere mei roto mai I te taokotai’anga tueporo o Aitutaki. Kua akaari katoa iatu ki teia uipaanga te akapapa’anga no te tarekareka tueporo o Rarotonga nei no teia mataiti te ka akamata atu I te maanakai ra 5 no Tiunu.
TE ARE KARIO NUI KA AKAMATA I TE OKO ATU I NGA RIPENE MIRE ATU NO TEIA MATAITI 2010
Apopo I te maanakai ka akamata te Are Kario Nui I te okooko atu I te ripene no te Mire Atu 2010 ki te makete I Ruatonga. Ko te Mire Atu koia mei roto mai teia I te akarere’anga tei rave’ia no te akamatutu I te angaanga ‘atu imene a ta tatou au mapu Kuki Airani.
Ko te moni I teia nga ripene ma te tutu teata no te Mire Atu e pera katoa tona ripene imene e $40.00 mea tara – aue te mama I teia nga ripene nei. Kua autu atu oki te imene a Travel Moeara mei Mangaia mai I tei tarere’anga no tana imene navenave.
TETAI IKA KINO POITINI I KITE’A IA MAI I RAROTONGA NEI.
Te akakite nei tetai mapu e angaanga nei no te akapuapinga I te tai moana koai a Teina Rongo e kia matakite rai tatou te aronga mome tai I teia au ra no tetai ika moana kino I kitena ia mai I Avatiu. I muri ake oki te mea oro’oro a Teina e kua manako aia I te pai tai I te ava I Avatiu e kua katia iatu aia e teia ika moana kini nei. E jelly fish oki I te reo Peritane. Te akakite nei ra tetai taunga koia a Gerard McKomiki e ko teia ika kino tei kitena ia mai kare tei reira I te ika matau I to tatou tai roto e te akamatakite katoa nei aia I te iti tangata kia matakite me aere pai tai I teia au ra nei, e mea kua kite koe e kua kati’a ia koe e teia ika kino nei kia are viviki atu ki te are maki no tetai rapakau.
TETAI NUTI MEI TE PA MOANA PATIPIKA MAI – TOKELAU
Kua piri atu te enua Tokelau I te akaari I ta ratou turu e ko ratou tetai kare e ariki ana I te au angaanga tamae I te to’ora I roto nei I te pa moana Patipika. Te akakite nei tetai arataki o Fakaofa koia a Aliki Faipule Foua Toloa I roto I tetai uipaanga a te pa moana patipika no te akarakara oonu atu I te au tu kino no te to’ora I roto I to tatou tai moana tei rave’ia I Akarana e ka piri tona basileia I te Kuki Airani, Autireria, e te manganui’anga I te au basileia o roto nei I te pa moana Patipika e te akatinamou nei aia te tai moana o Tokelau e auraka kia tai’a ia akaou te toora ka tomo mai ki roto I to ratou tai moana, e kia akono meitaki ia te to’ora aurakia kia taia ia.
Te akapakari nei I reira teia taokotai’anga I a Kiribati e Tuvalu I te mea ko nga basileia e turuturu nei I te angaanga taukore ta Tiapani e rave nei no te tamate atu I te to’ora I roto I to ratou tai moana I te mea te rauka mai nei ia raua tetai ‘a ngauru ma rima mirioni tara moni tauturu a Tiapani ki nga basileia.

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009