Te u’ati ripene tauturu i te opara i te turoto kia aere mai ki konei

I te tauturu I te akapuapinga I te makete turoto no te rere’anga pairere e akateateamamao’ia nei te ka rere ki rotopu I a Sydney e Rarotonga, te apai mai nei te tu’anga turoto o te Kuki Airani nei I tetai vaerua akama’uru’uru i teia rere’anga pairere na roto i te oronga’anga atu i tetai ‘u’ati ripene ki te au tangata ka rere i runga i teia pairere nei. Ko teia ‘u’ati ripene kia rauka i te oronga atu ki te au turoto tetai tauturu mama ki a ratou no te okooko i te tuatau i a ratou i roto nei i te basileia no te orote. E au pitiniti oki tetai i te Kuki Airani nei te turu nei i teia manakonako’anga ka akatupu ia e ko tetai ravenga meitaki teia i na ratou ei i te akauru i te turoto kia aere mai ki to tatou pae moana.
Kua akateateamamao ia teia ‘u’ati ripene e te maani’ia mai nei tei reira i Tinito e ko te kara e matie e pera te auro i te mea e ko te kara tinamou rai teia o Autireria e pera katoa te Kuki Airani nei e ko te ingoa ki runga i teia ‘u’ati ripene nei te karanga nei “Sydney ki Rarotonga kare e ta-pu 2010”. Ko te vaerua maata i muri i teia tamanako’anga na tetai mata rai i roto i te tu’anga turoto o roto nei i te basileia. Te akakite nei oki tetai mata mei roto atu i te Opati maata o te Turoto i roto i tetai uipaanga puapinga ki te nuti pepa e pera te ratio e i te mea e e manga taroaroa te makete ‘anga i teia rere’anga pairere ki rotopu ia tatou e Sydney kareka ra, ko tetai ravenga viviki teia e te puapinga ma te ngoie i tona rave’anga, e ko tetai ravenga katoa teia i te akamaroiroi i te turoto kia tarau i to ratou ngai noo’anga ki runga i teia rere’anga pairere.
E manganui oki tetai au pitiniti mama’ata tei turu i teia ‘u’ati ripene nei mei te ona pairere Nuti reni e pera tetai uatu au otera i Rarotonga nei. Ko te vaerua ma’ata oki i muri i teia akateateamamao’anga ka rauka i teia au pitiniti i Rarotonga nei i te oronga i tetai tutaki’anga mama mei te toru ngauru ma toru patene i runga i ta teia au turoto ka tutaki ia ratou i Rarotonga nei me kare i Aitutaki. E te akamaroiroi nei rai te Turoto o te Kuki Airani i tetai uatu pitiniti kia piri mai ki roto i te vaerua o teia akateateamamao’anga mei te nga tarau’anga apinga akaoro, te au are kai, te nga okooko’anga poe parau, te ngai ranga pakau e pera te are toa oko vai ta’inu’inu kia toto mai ki roto i teia. Me te anoano nei koe i te tomo atu ki roto i teia kia aravei atu ia Ani Riona ki ko i te Opati o te Turoto e ko te ra openga no tetai uatu kia tomo ki roto i teia akateateamamao’anga a teia Monite e tu mai nei i te ra 24 no Me i te ora toru i te avatea

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009