Te Karere

TEI DUBAI TE PARAI MINITA
Me te tai ngauru ma a au arataki mei roto atu I te pa moana patipika tei matuapuru atu ki Dubai, Arapia no tetai uipaanga tei kapiki’ia e te au basileia I raro ake I te ‘au Arapia. Kua piri katoa atu oki ki teia uipaanga te parai minita a Timi Marurai e pera katoa tona tere tangata tei kapiti katoa atu koia te aka’aere o te Tipatimani no te pae angaanga I tai mai te taote a Timi Gosselin e te tekeretere o te parai minita a Rosita Taikakara. Kua akaruke atu oki ratou I teia openga epetoma nei no teia uipaanga.
E kua riro e na ‘au Arapia I tutaki I to ratou tere ki teia uipaanga. Kua irinaki’ia oki e ko te ka rauka mai mei roto I teia uipaanga nei tetai kaveinga tau kia rauka I teia ‘au basileia I te tauturu I te manga iti I teia au patireia rikiriki I roto nei I te pa moana patipika. Ko tetai oki ta ratou e akara matatio nei no te tauturu I te turanga akapuapinga e pera katoa te turanga o te moni ta teia au basileia e tomo nei.
Kua ariki takere oki teia ‘au basileia I Arapia I te oronga mai ki teia au basileia e tai ngauru ma e mei te rima ngauru mirioni tara marike te ka riro I te tauturu I te orange o te iti tangata.
TE ECLYPSE I MANGAIA
I te rua epetoma e tu mai mai ko Mangaia tetai enua ka rongonui aia I teia nei ao me matakitaki atu tatou na runga I te avata tutu o teia nei ao I te eclipse. Te akakite nei te tangata akara reva a Arona Ngari e ka kite a Mangaia I te eclipse I te rua ngauru ma rua meneti e pati ei te ora varu I te popongi e mei te toru meneti te roa I teia mea umere ka kitena iatu.
Kua kitena ia mai oki e ko te au rere’anga pairere I teia tuatau kua ki tei reira e kare e noo’anga va no te maata I te au turoto te ka teretere atu I Mangaia. Ko te au are apii I Mangaia ka akariro’ia tei reira ei nga noo’anga no te turoto. E mea umere teia te ka tupu I Mangaia e te riro katoa nei te tu’anga Turoto I te opara I teia te ka tupu I Mangaia kia no te turoto tikai. Ko te au ro’I moe tei ta’angaanga iatu ana I te tuatau o te tarekareka iti o te pa moana Patipika I teia mataiti I topa kua tukuna iatu teia ki Mangaia e ka riro teia mea umere te ka tupu ki reira I te apai mai I tetai turanga teitei no Mangaia e per ate basileia.
GALA NA TE APII TUATAI AVARUA
Ka rave atu te apii tuatai Avarua I tetai kimikimi’anga moni gala a t era iva no Tiurai, tauturu I te akameitaki I te turanga o ta ratou ngai tarekareka timeni. Ka rave’ia teia kimikimi’anga moni I te apii rai e e manganui uatu te au metua te ka tauturu I teia akakoro’anga na roto I te angaanga kimi moni mei te okooko kai
MIKAERA JACKSON KI TE RSA I NIKAO
I te ra 25 no Tiunu I teia mataiti I topa akenei nei I takake atu ei te tangata imene rongonui o teia nei ao koia a Mikaera Jackson I tona ngutuare rai na roto I te mate atu’anga tona ate.
Apopo I te maanakai ka rave atu te RSA I Nikao I tetai akakoro’anga no te akamaara I teia aito imene nei tei riro ana oki aia I te akatuke I te ora’anga o tetai pae e manganui uatu rai e pini uake teia nei ao. Ka piri atu ki teia akakoro’anga tetai au aito imene I Rarotonga nei mei a Jeromeo Shedden, e Destiny Tara, te tangata akatangia G’Dub e pera a Tara Kauvai.
KIMIKIMI MONI NA TE APII TAPATI O MATAVERA
Ka rave atu te Apii Sabati o te Ekalesia Matavera I tetai kimikimi’anga moni apopo I te popongi maanakai akamata I te ora itu I te aiai. E toru ngauru tara I teia kimikimi’anga moni I te tangata okotai e mei te toru turanga kaikai taau ka kite kia pauna teia moni naau. E akakoro’anga teia no te Apii Tapati tauturu I to ratou tere turoto I Nuti Reni I te marama ko Titema I teia mataiti

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009