Te Putokotoko

TUMU MANAKO MAATA: TO TATOU AKARONGO KERISITIANO.
Kia Orana I te aroa maata o te Atua. E maata tikai to tatou au taeake e au oa piri mou tikai tei matau ia e tatou. Ko te mea akaroa kua kapiki mai te Atua ia ratou kia oki atu ki te kainga na te ara o te mate.
Te tai pae kua takake atu ratou I te mate tangata metua, te tai pae apikepike te kopapa na roto I te maki o teia nei ao. No reira, e mea tau kia aere tatou kia aravei I te au taote kia akara ia to tatou au tino me te peea nei.
E tama e maine e toru (3) a tatou Takiato tuatua e tuatua puapinga maata teia kia akara akaou ia eaa tikai to ratou turanga ka puapinga ia kia tatou I teia ra me kare.
TAKIATO TAI.
No ai toou tapuae vaevae uoou rai me no te tai ke, eaa te maata I toou tapuae vaevae. Eaa te numero e ono, e itu me e tai ngauru ma tai. I teia au epetoma I topa te tata ia nei te tumu manako no te “PA” ika I Ngatangiia. Kua akarongo atu taku taringa I teia openga epetoma I topa ake ni I te tai taeake Ngatangiia I te karanga e kua tano rai kia akatea ia te pa.
E te au taeake e tama e maine na teia I apii mai kiaku e ko teia taeake, kare ona tapuae I papu meitaki I te tupuanga mai I Ngatangiia. E maata te au tangata te aao nei ratou I te tamaka kare tikai I tona tapuae, no te meangiti kua patoa ia te vaevae e kua aka-maki kua riro mai I reira ei maki.
Te tai au tangata te aao nei ratou I te tamaka mamaata te ka topatopa ua e riro te reira I te aka tavarevare I tana aere I te ngai I anoano ia nana kia aere.
Aao ia toou tamaka kia tano ki toou tapuae.
TAKIATO RUA.
Eaa toou viki I te au ra ia koe e teatea mamao nei no te aere I teia mataiti 2011? Eaa teia mea e VIKI e rauka mai te aereanga tuatua o te viki me aere koe ki te maunga me kare ki te au o, me kare te au peka vai.
Ka ira e ka kitea te viki no te tai aereanga tangata takitai me kare pupu tangata maata me aere ratou ki te maunga, ko te putuputu I te aere ki te maunga na teia mea mataora kua riro mai ei viki, me kare ei mataara ki te maunga, te peka vai, e te vai atura.
Ka pari koe I te tau au atava rakau tei riro ei tamanamanata I teia viki taau e aere nei. Te karanga a Iesu e akara I te au mea roarai e te meitaki ra, ka tapu marie, me kare ka tuku kia aere I te arataa.
TAKIATO TORU: ARA TANGATA.
Ko te tuatua Ara Tangata no runga te reira I te aere akau. Ka kitea ia teia I roto I te oraanga o te au ravakai tautai akau.
Ko te ara tangata, ko te putuputu I te reira ravakai I te aere ki runga I te akau na taua nga o te kaoa o te akau I te au ra, tai pi me kare tai maro. Ka ati ati te kaoa e ka riro mai mei te mataara. Kua pera ki te turanga o te Viki.
Te putuputu ia koe I te aere ki runga I te akau na teia arataa ko te iraanga mai te reira ara kua mate te kaoa kua riro ei arata. Me po tikai me maro te tai takarere ua teia ara tangata.
Akara ia toou tapuae vaevae, toou viki e toou ara tangata e te peea nei.
Te karanga nei a Iesu mou piri I taau korona auraka kia riro ia e tai ke.
Eaa te kaveinga no teia mataiti 2011? Te karanga nei te Maseli. “Kare e orama ia mai e akonokore ia tangata I reira, e ao ra tona, to tei akono I te ture ra.”
Te uianga taku e ui nei au I roto I toku uorai ngakau. Eaa te orama a te tangata takitai me kare ra, te putuputuanga, te taokotaianga t au evangelia no te tupuanga o te Basileia Keresitiano eaa te orama a te kavamani no tana au parani angaanga.
Me rauka ia tatou I te kimi I to te Atua vaerua na roto I te pure, tatau i tana tuatua tika, ka kitea e tatou ta te Atua e tuatua ma nei. Kare te akameitakianga e aere mai me noo ponioou ua tatou.
E tu e te Kuki Airani. Kua marama koe kua te mai oki toou marama kua iti ia koe e te kaka te tapu nei o te Atua.
Kua aka-rangatira te Atua ia tatou na roto i te tono anga mai i tana tamaiti anau tai, ki roto i teia nei ao, kare a Iesu ara kua apai ra aia tatou au ara ki runga iaia kia tau to tatou tamaka i te aao kia kore e pipiri me kore e topatopa i te au ra e aereia e tatou.
Te ara ki te maunga (viki) Ko Iesu te turama i to tatou au aerenga koia to tatou marama e i te openga oraanga ori aere ua i roto i teia nei ao poiri.
Teia ta Iesu i akakite mai aere mai kotou kiaku nei te aronga tei teiaa i te apainga, naku e akaanga i to kotou roi (Mataio 11:28)

By Reverend Ngarima George

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009