Te Putokotoko

E maata te au mea te ka riro ei akaraanga na tatou I te Kuki Airani nei, me kara ra I Rarotonga nei. Ko te au taii e kitea nei ki te au enua mamaata o teia nei ao.
AUTIRERIA.
e maata tikai te au mea tumatetenga tei tupu, akara kia Brisbane. Te vai puke tei riro ei mamae ngakau ki te tai maataanga tangata. Kua taitaia tikai te Peremia i te au mea tei tupu. Te au tangata tei na te ara o te mate.
Te are o te tangata kua pakoko ia to ratou au apinga ngutuare te motoka, e te tai au apinga punga o te ngutuare. Aue eaa ia tu tei tupu. Te rua kua tupu katoa te uriia kare i kitea ia ana e numero 5 i roto i te tareanga o te uriia o teia nei ao.
Townsville, Cairns, e te tai au tuanga o Brisbane kua atiati te au rakau te tauu o te au are o te tangata. Kua puia te reira e te matangi.
MELBOURNE.
kua tupu katoa te tai taia e te mamaengakau ki te au tangata o te au oire i vao mai ia Melbourne, Echuka, Horsem e te tai au oire rikiriki ma tei vaitata ki teia au oire. I teia epetoma i topa ake nei kua puke te vai i Narrea Warren Hampton Park, Fountain Gate. E maata te au tangata Kuki Airani tei ki to ratou au are i te vai te garage, kua ki i te vari aue te akaroa i teia e tupu nei.
PERTH.
E maata te au are tei ka i te ai e au are te tai no te tai au tangta ona mirioni i akamata teia na te tei akava te maani apinga ra aia ki te matini uira e oti ake ra kare te reira au angaanga e akatika ia (Total Fire Band) Te akakite nei te nuti me apa aia ka akautuanga ia aia e $25000. Kua riro teia ei mea mamae ngakau ki teia akava.
Noku rai toku manako i roto i taku kimikimianga e te uiui nei rai au eaa teia e tupu nei ki Autireria. Kare teia i te mea meangiti e mea maata tikai teia i roto i te oraanga tangata ka karanga tatou e tumu te tai no teia tei tupu te uianga, eaa toou me kare to kotou manako?
Ko au i toku manako te akatoro mai nei te Atua i tona rima ki te tangata o Australia. Akara ki te turanga o te Basileia. Kua iki a Australia i tona arataki e vaine, e te noo nei aia ki tana tane kare raua i akaipoipo penei ko ta te Atua teia e aa nei ia Australia, kia oki mai kia akatika ia te oraanga o te tangata e pera ki te au arataki.
Ko te arataki e mea manea kia mataku te arataki i te Atua, e kia noo tiama aia ki mua i te tangata e pera ki mua i te Atua.
Akara ki te au aratia o teia au ra te aka matakite mai nei te Atua ia tatou te au tamariki Keresitiano kia pure e kia apai i to tatou au arataki e te aronga mamaata o te enua ki te terono tapu o te Atua.(1.Timoteo 1-3) E tamata ana au i te ako atua ia koe e, ei te akaora te pure te pati e te akameitaki i te Atua i te tangata katoa kia noo kangakore ia mai tatou, ma te au ma te akono i te Atua e te au tika tikai.
Penei e manako tano teia no Autireria penei e manako ua.
Akara ki to Aiphiti te patoi nei te tangata i to ratou arataki, kare ra e tika tau i rauka mai te karanga nei te tauturu President kare Aiphiti e mangatoa ia kia riro mai ei Basileia Democratic.
NIU TIRENI.
Te tauetono nei te maori ki te kavamani a Tioni Taviri raua ko Petero Sapara, kare a Hone e ariki ki teia e tupu nei ki te taokotaianga o te maori.
Te akakite nei te au tangata kite i te akara i to tatou reva e 5 aereanga toe o teia tuatau uriia kua peke te reira ia tatou.
Ko te au enua o te Moana Pacifica te manuia nei tatou i te Kuki Airani auraka e rere ua i te rekareka, e noo ma te akamaara e te akameitaki i te Atua, kare tatou e inangaro i te tai o teia 5 kia tae mai na konei ia tatou.
E tama e maine, teia ake rai a Aitutaki kare ake rai i oti ake te au angaanga no te uriia i oti i teia mataiti i topa.
I teia epetoma e 3 a tatou au mapu tane tei aere i te tautai e kua u atu ki te ngaru e kua tatepoki to ratou poti kua oki mai e tai i te kimi tauturu ko te mea akaroa kua taui akaou te reva e kua aere te kimi kua kitea naringa ko te reva o teia ra Ruitoru. Kare au e manako e ka kitea penei kua tumatetenga tatou. E akameitaki ia Iehova taku vaerua e auraka tona katoa ra au takinga meitaki kia akangaropoina ia (Salamo 103:1)

By Reverend Ngarima George

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009