E au Tuatua “PARABOLE”

I roto I te Koreromotu Ou e maata te au tuatua Parabole ta Iesu I tuatua, me kare I apii ki tana au pipi me kare Aposetolo no te akatauanga oraanga tangata ei apii viviki kia ki-te I te tu tikai o te oraanga.
Kia Orana I te aroa maata o te Atua I teia epetoma ou. Kua na roto mai tatou I tetai au epetoma tuketuke te aerenga o to tatou reva, te ua, te matangi e te veravera ra.
I tetai au ra manea kia akara mamao ia atu e I muri ake kua topa viviki mai te ua. E te au taeake e tu manuia tikai teia no tatou kare o tatou uriia I tae mai ake, penei ko to tatou uriia ua teia e ua.
I te tuatau I mua ake ka tae mai ei te Evangelia, kua noo katoa to tatou ui – tupuna I roto I te totouanga tuatau akakiteanga tuatua na roto I te Parabole. Mei teia te tu “Kia pu-kuru o vaevae e kia mokora o kaki, e tiro te mata ki o Rongo, E tama e maine, e ma e pa e aiteanga pakari tikai e te oonu teia nei parabole no tatou.
Ka oki tatou ki te apiianga a te Bibilia ei akamaramarama no te aiteanga o teia tumu manako nei. E maata te au tuatua parabole ta Iesu I tuatua. Teia te tai pae o te au tuatua parabole.
1.Te parabole o te mamoe ngaro, moni ngaro e te tamaiti ngaro
2. Te parabole o te Ruru ua te turanga o te au ua tei topa ki roto I te au one tuketuke
3.Te parabole o te Ua Sinapi
4. Te parabole o nga paretenia Tino – ngauru, e 5 mea pakari e 5 mea auouo.
5. Te Tavini akono meitaki e te Tavini akono makokore
6. Parabole o te Oroa akaipoipo
7. Te parabole o te Kainga Vine
E maata, e maata ua atu rai te au tuatua parabole. Kare e pou to ratou aiteanga kia kimi tatou I roto I teia epetoma nei.
E te au taeake te vai katoa nei te au parabole a to tatou ui – tupuna tei riro ei akaraanga na tatou I teia tuatau nei.
1. Kia pu – kuru o vaevae kia mokora o kaki e tiro to mata ki Oronga.
2. E tinana kai moa, ka kai moa rai te pupu-punua
3. Aaere maria e aku potiki, kia kite korua I nga ina potea
4. Kainga turituri, kainga ora, kainga kare e turituri e kainga mate.
5. Eiaa koe e ra tao e eiaa koe e mou I te ko e mou I te ere me rave koe I teia au mea nei naku koe e potaka me te pua rai.
6. Ka kite to mata kare ra to vaa e kai.
7. Te moa e kakaoa na mua nona rai te ua.
8. Tamaiti kite ra rekareka anga ia na te metua tane, ka reka te tamaiti kite kore e aueanga ia na te metua vaine.
Mataio 13:3 –
E manganui ta Iesu tuatua parabole I tuatua I roto I te Mataio 13: Kua akakite a Iesu, Ina aere atu ra te ruru ua e ruru, e tei te ruruanga, topa iora te tai pae ki te pae arataa rere maira te manu o te reva e kai iora, Te tai pae ki te ngai paikea kare I rai te one I reira tupu vave no te mea e papaku oki te one, mate atu ra. Te tai pae ki roto I te ngangaere tupu te ngangaere pokia atu ra, topa te tai pae ki te ngai one meitaki, tupu ake ra uua iora. Taki tai anere ono ngauru e toru ngauru I te ua okotai.
E maata te apiianga I roto I teia parabole ka tau kia akaaite ia ki to tatou oraanga tangata.
Ko te au tu one o te oraanga tangata nei kua pera kia akatau me kare akapiri ki te oraanga o te vaerua. Kare tatou e inangaro I te ua meitaki o te Evangelia kia pokia e te ra, te one paikea te pae arataa. Ko ta tatou ka inangaro ko te one meitaki kia ua mai 100, 60, 30 I te ua okotai.
30 kare au e inangaro ko te tumu te raro ake aia I te apa (50) e toru ngauru meangiti roa. Kare e pauna te taime.
60. Kare rai au e ariki no te mea tei runga ua ake I te 50 Kare rai e pauna te tuatau
Te 100 I te ua okotai ko ta tatou teia ka inangaro. Ko ta te atua aka rangatira anga teia ia tatou.

By Reverend Ngarima George

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009