Te Karere

Te inangaro nei te Cook Islands Economic Taskforce tei akatupu ia mai e te kavamani no te timata I te akamatutu I te turanga kimi puapinga o te basileia, kia tuku atu te au tuanga katoatoa I runga I te enua I tetai au tamanakoanga ka akapeea I te akamatutuanga I te tupuanga o te akapuapinga. Kua akakite te Tiemeni o te Taskforce a John Tierney, ka tauru ia ta ratou au tamanakoanga ki roto I te parani maata te ka akaari ia ki te katoatoa I roto I te Uipaanga Economic Summit ka rave ia I roto ia Aperira. Kua anga ia mai e te Taskforce e 6 pupu te ka mata I te au tuanga puapinga e akatere nei I te turanga akapuapinga o te basileia. Kua akakite katoa a Tierney e me ka inangaro te au oire I te aravei I tetai o te au pupu I akataka ia ka rauka te reira I te akanoo. Te inangaro nei ratou kia papu e ka o mai te katoatoa ki roto I teia akakoroanga.

Apopo te kimikimianga moni maata mua a te oire tangata o Akaoa e Murienua no te akaou I to ratou are uipaanga. Ka akamata te okooko I te kai umu I te 10 I te popongi ki ko I Te atukura aru atu I te reira te kimi moni Radiothon na runga I te Ratio Kuki Airani te ka akamata I te ora tai I te avatea. Ko te aronga ka inangaro I te oronga atu I tetai au kai tauturu no te oko atu ki vao e taniuniu atu ia Doreeen Boggs I runga I te numero tereponi 25 483 me kare ia Ruru Taura ki runga I te mobile 70 005.

Kua rauka mai I teianei te peapa ngateitei no te iriiri poe parau o te nga mapu patia poe parau o Manihiki a Tamuela Karaponga e tona tuaine ko Mehau Johnson o te Cook Islands Pearl. Kua pati teia nga mapu I te tarere a te Pearl Authority I akatupu mai I teia mataiti I topa. E akakoroanga teia no te akararangi I te kite karape o teia nga mapu e na roto I teia kua maata mai te tangata I inangaro kia rauka ia ratou teia turanga.

Kua akakite te akatere o te Community Initiative Scheme a Teariki Rongo e mei roto mai ia Peperuare o teia mataiti I topa e tae uatu ki roto ia Titema e 33 au akakoroanga I akatika ia e teia pute moni. Ko te moni o teia au akakoroanga kua taeria mei te $5000 ki te $20,000 inara kua akakite mai tetai au rekoti e au akakoroanga tetai I pati Ia ratou teia turanga moni. Kua akakite katoa a Rongo e kua pou te $410,000 ki runga I teia e 33 akakoroanga I akatika ia e te Community Initiative Scheme.

Nuti Tipoti
Te tue nei te Raoni 3 o te tueporo League I teia epetoma e ko teia te au toro: Ka tue atu I teia ra ki Avatiu te Avatiu Eels e te Titikaveka Bulldogs
Ka akamata atu te reira ki te U19 I te 4 I teia avatea aru mai ko te Reserve Grade.I te Varaire i Avatiu, ka tue atu te U19 I te ora 4 I te avatea aru mai ia ratou te Premier grades.

Uri’ia e Julie Taripo Shedden

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009