Te Putokotoko

Kia Orana akaou tatou I te aroa o te Atua.
Ioane 3:16 I aroa mai te atua I to te ao nei kua tae rava ki te oronga anga mai I tana Tamaiti anau tai, Kia kore e mate tei akarongo Iaia kia rauka ra te ora mutukore.
E tama e ine, e ma e pa, ka rauka ia tatou I te tuku I to tatou ingoa ki roto I teia irava mei teia te tu o te tangi anga. Akaraanga I aroa mai te Atua ia Ngarima George, na roto I tana tamaiti ia Iesu Mesia kia kore a Ngarima George e mate kia raka ra ia Ngarima George te ora mutukore. Ko te putuputu ia tatou I te taiku I teia irava ko te maata atu ia o te Mana o te Atua I roto I to tatou oraanga.
Teia nei ka akara tatou I nga tuanga e 4 o te oraanga Kerisitiano. Ko teia no te aronga tei anau akaou ki roto ia Iesu Mesia.
Tuanga Tai:
Ko teia mea e oraanga kua ki te aroa te takinga meitaki, e oraanga rangatira te reira, ko teia oraanga no ko mai I to tatou Atu ia Iesu Mesia. Akara ki te Bibilia, kua ki te reira I te au tuatua ora no Iesu Mesia.
Ko Iesu, kare Aia I aere mai ki teia nei ao I te ako I tana akonoanga no te mea kare ana akonoanga. Kare ana peu te ka riro ei aka atea ia koe kia piri vaitata ki te Atua, ko ta Iesu e apai mai mari ua ko te ora mutukore, E riri maata tona I te ara e tangi maata tona I te tangata. Kia tatara ara kia matara te ara kia ora te vaerua mei te mate mutukore.
Roma 3:23 “Kua ara katoatoa te tangata I te Atua e kua ngere I te akameitaki anga ko te utunga o te ara ko te mate mutu kore.”
Tuanga Rua:
Kua akaora a Iesu I te au maki, kua aere mai te aronga maki e kua akaora a Iesu I te reira. Kua oronga a Iesu I te ‘au ki te tangata tei aere mai I te akakite I te reira taui e te taitaia. Te akakite nei Aia kia vai mai te akarongo kia kotou, kare I reira e tano e ka noo tatou I roto I te oraanga mataku. (Mataio 11:28)
Kua anau ia mai te Mesia ei taranga ara noou e noku, to tatou au teiaa e uri ki runga ia Iesu. Akara eaa ta te Atua e rave nei, I teia tuatau. Te tupu nei te uriia, te ngaruerue enua, te tamaki nei te au enua mamaata I roto I teia nei ao, Aiphiti, afganastan, Tonga, Samoa, Somalia e te vai atu ra.
Akara kia Tahiti, kua akaruke a TeoN Dong e ono ona Minita pouroa te au enua o te moana Pacifika, Fiji, Vanuatu Taratoni, ka ui tatou eaa teia e tupu nei penei kare teia au enua I matutu ki roto I te Atua. To ratou au arataki ra te ngere nei I te kite I to te Atua pakari, ko teia te politiki I teia tuatau, politiki no te enua kia oki ki te turanga rangatira ta te ui tupuna I mou.
Te mate nei te tangata e ko te mea akaroa me kare teia au tangata I anuau akaou I roto ia Iesu e kia akaki ia ratou e te mana o te Vaerua Tapu
Tuanga Toru:
Te akakite nei te tangata maata o te Immigration te maata o te au tangata
porena e noo nei e te angaanga nei ratou I te Kuki Airani nei. E te akakite nei aia e maata te au ture kia aru ia e me kare te au tangata porena e ariki e tipuia ta ratou tikaanga noo mai I teia Basileia.
Tuanga A:
Akarongo angaanga, akarongo ora,, akarongo Kare e angaanga akarongo mate, ko te akarongo e tuanga maata teia I roto I te oraanga o te Kerisitiano.
“Ko te akarongo nei ko te tumu tikai ia o te au mea e tatari ia nei e te kite I te au mea kare I akara ia. ( Ebera 11:1)
E tama e maine I raro I te Punanga Nui Makete I te tai au taime kare au e oko I te varaoa varaipani, oake ua ki te au taeake (Free) I tetai au tangata e au taeake no maua. Kare ratou e mataora me oake koe I te kai free. Teia te tuatua a te Atua “E titiri I taau kai ki runga I te vai e manganui ake ra te ra e rauka akaou mai taau.”
Ko te tai muna ngaro teia o te kimi puapinga me rauka ia taua I te oronga I ta taua kai, te moni e te vai atura ka akameitaki te Atua ia taua, ko ta maua teia e kite nei I te makete.
Eaa te tau I to akau, e ei poroporo e ka kiriti ka kiriti e ei poroporo, e ei poroporo, kia tauturu mai te Atua ia tatou no teia openga epetoma. Te Atua te aroa ia tatou.

By Reverend Ngarima George

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009