Te Putokotoko

Kia Orana akaou tatou I te aroa maata o te Atua.
Ebera 13:8 “Okotai rai o Iesu Mesia tu, inanai I teia nei ra, e tuatau ua atu”
E te au taeake te noo nei tatou I roto I teia nei ao, e te kitea nei te au tauianga tuatau, ka kitea ki roto I te tauianga o te reva, tauianga o te au mea natura, taui te tu o te tangata, taui katoa te peu.
I roto I te oraanga vaerua te taui katoa nei te reira. Ko tatou ra e tupu nei I roto I tona aroaua e te kiteanga I tona marama kaka ka kitea katoa teia tuanga I roto I te oraanga vaerua.
Te karanga nei tetai Orometua e te kitea katoa nei tetai au tauianga I roto I te au angaanga a tetai au Orometua, mei to ratou irinakianga ki te Atua.
Ia Petero, Ioane, e Iakoba I runga I te maunga e te Atu ko Iesu, kua kite katoa ratou ia Elia e Mose te tu ra ma Iesu katoa. Kua itirere a Petero e kua inangaro aia kia patu aia e 3 are puakapa no ratou I te take o te maunga.
I reira kua tapoki ia ratou e tetai tiao e kua tuatua mai te Atua, ko taku tamaiti akaperepere teia kua mareka rava au iaia e akarongo kotou iaia (Mataio 17:8)
Kia nana ake to ratou mata ko Iesu anake teia ko to Petero manakonakoanga kia akatu I te au are ki te take o te maunga kare te reira I tupu.
E maata te taime ia tatou I te noo kki runga I te au manakonakoanga tangata e mea inangaro na tatou kia akatupu I te reira au mea I roto I te oraanga. Kare rava a Iesu e ngere I te tuanga o te oraanga meitaki. I tetai au taime ka ngere tatou I te oraanga meitaki ka tae mai te maki ki to tatou kopapa. E mea tau kia apai I to tatou au maki e te tumatetenga kia Iesu.
E kia marama tikai tatou ko taua Iesu tei aaere I te pae taatai I Galilea tei akaora aia I te mata o te matapo tuaru I te au verua demoni, akapuera I te taringa turi e te akaora I te au tu maki tuketuke.
Akara kia Ioane Bapetizo, ko te peroveta tei ako I te karere o te ora I te medebara tei tono I tana au pipi kia ui atu e me ko koe ainei te Mesia (IESU).
Kua akakite a Iesu e oki kotou e akakite kia Ioane Bapetizo e koia teia tei tono mai te Atua, e kare ake aia I ngere I te tuanga a te Atua.
E ma e pa, me paruparu to tatou akaronga e me akamata tatou I te aere maria I te au akaueanga a te Atua e oki e akamaara tei ia tatou te Atua koia te tika kia maro mai.
Ae e mea akaroa I tetai au taime e riro to tatou au taeake pirimou I te pikikaa e te rave kino mai ia tatou. Kua akakite a Paulo I te tuatua I te Mesia I te Satauro I Karavaria, kare e tangata I manako I te tauturu. Kua ko ia ra aia no to tatou au kino. E akamaara tei vaitata aia ia koe, iaku, ia tatou e tae ua atu ki te openga.
Noatu e me tae mai te mate ki tetai o to tatou au kopu tangata kia kite tatou e ei vaitata aia ia tatou.
I tetai au tuatau kua ngere tatou I te moni e aka manako te vai nei rai a Iesu e te noo nei I toou pae e pati I taau I anoano.
Te tupu nei te tamaki I teia nei ao akara kia Lybia, Syria, Initia, Pakistan, North Korea e te vai atura te au tangata e manganui e matemate nei. E te au taeake oki mai tatou ki te mato e te Tipoko o te vaarua I pao ia mai tatou.
Kua rava teia te Atua te Aroa.

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009