Te Tauturu a Rakei Toa ki te mapu tamaroa Kuki Airani
Na roto i te tauturu a te akava e te nga puapii koia a Pota Pokura e Turori Matutu i te tauturu i teia au tamariki kare e oki akaou ana ki te apii. Inara i roto i te ture a te Maraurau o te pae apii, kare e tamaiti e akatikaia i te noo ki te kainga mei te mataiti 16 e aere uatu ki raro. E rua nga puapii e riro ana na raua e tauturu ana i teia au tamariki nei. Kua kitea ia mai teia au tamariki mapu tamaroa kare e meitaki ana to ratou turanga i te apii,paruparu te oraanga i te angaanga e pera i te ta’anga’anga i te numero e te tata. I teia nei kua akatupuia tetai porokaramu, ko te umumu maata koia oki i te tauturu i teia au tamariki kia kore e o ki roto i te manamanata mei te keikeia, ta tangata, kai kava e te maruana. Ka riro teia taokotaianga i te akatikatika i teia au tamariki kia manono i te rave i ta tatou peu maori, tipoti,toro mei tei matauia i te raveia ki roto i te pae o te apii. Ko te aiteanga o teia ingoa ko te Rakei Toa koia oki i te aka kakau’anga i ta tatou anau mapu i te ora’anga tiratiratu. Mei te taime i akamataia mai ei teia porokaramu e tairia ia ana mei tetai 60 tamariki e na roto mai ana i teia porokaramu. E 3 mataiti i teia porokaramu i te angaanga’anga na roto i te tauturu a te au akava, mei te mea e,kare e rauka ana tetai pae au tamariki i te akameitaki mai i to ratou ora’anga. I roto katoa i teia tuanga te vai nei tetai au pae tamariki kare e manono ana no te aere ki te apii, penei no tetai au tai’i. Inara te akara matatio ia nei teia au tamariki e noo nei ki te ngutuare kia aruaru i te aere mai i roto i te porokaramu Rakei Toa. Ka riro teia ei akaiti mai me kare ra i te kopae i ta ratou angaanga kino e tamanako ara ratou i te rave. I roto i ta raua tuanga te akarakara nei raua i tetai ravenga i te tauturu i teia adu tamariki na roto i te tatau, toro, e te vai atura mei te mea oki e, kare i tetai i teia au tamariki e kite i te rave i teia au angaanga, e pera katoa kare to ratou initereti e inangaro i te rave o teia. I teia ra kua apina iatu teia au tamariki ki roto i te runanga puka tatau (National Library) i te kimikimi matatio i te au puka tua taito o te Kuki Airani nei. Te apii katoaia nei ratou i te rave i te angaanga tane mei te adngai puaka,tautai,uri pai e te vai atura kia kite ratou ka akapeea i te akatupu’anga i tetai ora’anga meitaki. Kua kite katoa mai raua i roto i teia au tamariki te aru nei i te angaanga tarevake a to ratou au taeake e kua tupu mai te manako kia akatupuia tetai angaanga meitaki ei tauturu ia ratou kia kore e rave i tetai angaana tarevake. Te rauka nei ia raua i te pati i tetai tauturu ki te iti tangata kia tauturu mai i teia porokaramu no runga i ta tatou mapu kia kore e inga ki runga i te mataara kino. -Bernadette Teremoana

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009