Iriirianga kapua “... te turanga o te taui`anga reva”
I teia epetoma nei, akamata i te pōpōngi i te 8.30, Ruitoru 22 – Paraparau 23 ki roto i te Are `Akatakapātoa o PMG i Parekura, kua rave `ia tēta`i `Iri`iri`anga-kāpua na tēta`i au tumu-karere no te au `enua o te Patifika nei, mei roto mai i te tu`anga o te tātā nūti, tatau `ē te akakite`anga nūti ki runga i te rātio `ē pērā katoa te `āvata-teata. Mei tēta`i 16 tūmā rātou i tae mai ki te Kūki `Airani nei, mei te `enua mai o Fiji, Tuvalu, Solomon, Palau, Niue, Samoa e te vai atura. [Kua tae mai oki teia pupu-tangata no te akakoro`anga ma`ata o te Paific Leaders Forum te ka rave `ia ki Rarotonga nei, a teia au rā ki mua e tū mai nei.]
Ko teia `Iri`iri`anga-kāpua, tei rave `ia, ko te `akakoro`anga koia oki, ko te “Working with Pacific Media Strengthen your capacity to communicate climate change” me kore ra, ko te Anga`anga ki te pae i te Karere Patifika ma te Akamātūtū kia rava tō`ou kite no te `akamārama i te tūranga o te taui`anga reva
Kua manuia tikāi te Kūki `Airani, no teia tika`anga mei ko mai i te putuputu`anga SPREP i Samoa `ē pērā katoa te turuturu`anga a te AusAID, kia rave `ia teia `Iri`iri`anga Kāpua ki Rarotonga nei.
`Ē i runga atu i teia, kua tuku katoa `ia mai ki te Kūki `Airani nei e toko-rua nga va`ine māpū `ē te kama`atu no runga i teia tāpura mei Samoa mai, no te `akatere i teia `Iri`iri`anga-kāpua. No reira, kia ngakau-parau oki tātou, no te mea ko teia nga va`ine kama`atu i tuku ia mai, e nga va`ine Kūki `Airani anake rāua, koia oki ko Nanette Woonton, Media & Public Relations Officer, `ē pērā katoa a Diane McFadzien, e Climate Change Adaptation Advisor.
Te akakite mai nei a Nanette, e ko tēta`i au apinga puapinga kia marama tātou, koia oki, `ea`a te au taui`anga reva e tupu nei, `ea`a i tupu ei, ka `akape`ea tātou i te no`o `anga ki te pae i teia au taui`anga, `ē ea`a tā tātou ka rave `ē pērā katoa kia putuputu tātou i te tuatua i teia e tupu nei ki roto i te ngutuare i te au taime ravarai. E pērā katoa oki, kia ngo`ie ua i te au tumu-karere i te akakite i teia tāpura ki ta rātou au mātakitaki i roto i te akamārama`anga māmā, kia mārama oki rātou e akarongo mai nei.
Te akakite mai nei a Diane, e ko tēta`i pae i tāna `anga`anga e rave ana koia oki, ko te `anga`anga tāokota`i ki te au kavamani o te au `enua Patifika, ma te `oronga atu kia rātou te karere tau, tauturu i te akamārama ki te iti-tangatai te tūranga o te taui`anga reva, tauturu katoa ia ratou no te kimi atu i tēta`i au tauturu mei va`o mai `ē te vai atūra.
No reira e mea puapinga e kia mārama tātou `ea`a teia e tupu nei i roto i to tātou aorangi `ē tō tātou ora`anga `ē kia rauka `iā tātou tātakita`i i te `ātuitui i tō tātou au mārama kia ngo`ie `ua ia tātou i te mārama, i te pāruru `ē te rapakau i tei manakokore `ia i roto i teia tuātau: -Ruteera Taripo

Headlines : Times 290 02 March 2009
- Lucky $1,000 winner
- Century old palm trees and the French connection
- Koutu Nui takes part in Raui meeting in Moorea
- WOM Award Dinner for Ake Hosea-Winterflood
- Island of Atiu to host Koutu Nui AGM in June 2009